Yeni bir araşdırmanın nəticələrinə görə, piylənmə ilə yaşayan insanlarda ağır yoluxucu xəstəliklərə tutulma riski 70 faiz daha yüksəkdir.
“Cebheinfo.az”-ın “The Lancet” jurnalında dərc olunan yeni bir araşdırmaya istinadən bildirdiyinə görə, piylənmədən əziyyət çəkən insanlarda qrip, COVID-19, pnevmoniya və ya qastroenterit kimi yoluxucu xəstəliklərdən xəstəxanaya yerləşmə və ya ölüm ehtimalı artır.
Tədqiqatda piylənmə ilə ağır yoluxucu xəstəliklər arasındakı əlaqəni araşdırmaq üçün Finlandiyada 67.000-dən çox yetkinin və Böyük Britaniyanın Biobank verilənlər bazasından 470.000-dən çox yetkinin məlumatları təhlil edilib.
Helsinki Universitetindən Solja Niberq bildirib ki, qlobal miqyasda piylənmə nisbətlərinin artması gözlənildiyindən, piylənmə ilə əlaqəli yoluxucu xəstəliklərdən ölüm və xəstəxanaya yerləşmə də artacaq. O əlavə edib ki, sağlam həyat tərzini və çəki itkisini dəstəkləyən siyasətlərə, o cümlədən əlverişli, sağlam qidaya çıxış və fiziki fəaliyyət imkanlarına, ağır infeksiyalar və piylənmə ilə əlaqəli digər sağlamlıq problemləri riskini azaltmaq üçün təcili ehtiyac duyulur.
Alimlər tədqiqatın əvvəlində iştirakçıların bədən kütlə indeksini (BKİ) ölçdülər və onları üç qrupa bölüblər: normal çəki, artıq çəkili və piylənmə.
Tədqiqat nəticəsində məlum olub ki, piylənmədən əziyyət çəkən insanlarda hər hansı bir yoluxucu xəstəlikdən xəstəxanaya yerləşdirmə və ya ölüm riski normal çəkili insanlara nisbətən 70 faiz daha yüksəkdir.
Tədqiqat rəhbəri London Universitet Kollecinin əməkdaşı Mika Kivimaki deyib:
Onun sözlərinə görə, piylənmənin immun sisteminin yoluxucu bakteriyalara, viruslara, parazitlərə və ya göbələklərə qarşı müdafiə qabiliyyətini zəiflətməsi və bunun daha ağır xəstəliklərə səbəb ola biləcəyi olduqca mümkündür.
Eyni zamanda, bu əlaqələrin əsasını təşkil edən mexanizmləri təsdiqləmək üçün əlavə tədqiqatlara ehtiyac var.
