Zürafələr uzun boyunları ilə məşhurdur, lakin məhz bu xüsusiyyət onların orqanizmini ekstremal rejimdə işləməyə məcbur edir. Qanı böyük hündürlüyə çatdırmaq zərurəti səbəbindən bu heyvanlarda arterial təzyiq çox yüksəkdir - orta hesabla 200-250 mm civə sütunu təşkil edir ki, bu da əksər məməlilərin göstəricilərindən iki dəfədən çoxdur...
Poliqon xəbər verir ki, bu barədə Discoverwildlife yazır.
Buna baxmayaraq, zürafələr insan üçün ölümcül ola biləcək fəsadlardan əziyyət çəkmirlər. Avstraliyanın Adelayda Universiteti və Cənubi Afrikanın Pretoriya Universitetinin tədqiqatçıları müəyyən ediblər ki, burada yalnız uzun boyun deyil, ayaqlar da mühüm rol oynayır.
Alimlərin sözlərinə görə, uzun ətraflar sayəsində ürəyin nisbətən yüksəkdə yerləşməsi ürək-damar sisteminə düşən yükü qismən azaldır. Bu isə cazibə qüvvəsinə baxmayaraq, qanın beyinə daha səmərəli daşınmasına kömək edir.
Zürafələr fəsiləsinə aid fosil qalıqların analizi də göstərib ki, uzun ayaqlar təkamül prosesində uzun boyundan daha əvvəl formalaşıb. Yəni bu iki xüsusiyyət tədricən və bir-biri ilə əlaqəli şəkildə inkişaf edib.
Bununla belə, qeyd olunur ki, belə anatomiya bəzi çatışmazlıqlara da malikdir. Məsələn, su içərkən zürafələr ayaqlarını geniş açmalı olurlar ki, bu da onları yırtıcılar qarşısında daha həssas edir.
Poliqon.info
