Kiçik iltihab orqanizmin zədə və ya xəstəliklərə normal reaksiyasıdır. Xroniki iltihab isə başqa məsələdir. Xoşbəxtlikdən, bu problemi, o cümlədən qidalanma rejimini dəyişməklə həll etmək mümkündür...
Poliqon xəbər verir ki, bu barədə Prevention yazır.
Məqalədə qeyd olunur ki, tərkibindəki antioksidantlar sayəsində çaylar iltihabəleyhinə təsir göstərir. 2020-ci ildə National Library of Medicine-də dərc olunan araşdırmaya görə, bu maddələr zamanla orqanizmdə iltihabi prosesləri azalda bilər. Diyetoloqlar iltihab zamanı ən təsirli hesab edilən beş çayı açıqlayıblar.
1. Yaşıl çay
Yaşıl çay dünyada ən çox araşdırılan içkilərdən biridir. Ekspertlər xüsusilə onun beyin sağlamlığına müsbət təsiri barədə çoxlu məlumat olduğunu bildirirlər. Bundan başqa, bu içki iltihabla da mübarizə aparır.
Diyetoloq Eyveri Zenker deyir: "Yaşıl çayın tərkibində antioksidant xüsusiyyətli polifenollar, o cümlədən katexinlər var. Həmçinin L-teanin adlı amin turşusu mövcuddur ki, bu da beyin hüceyrələrini oksidativ stressdən qorumağa, iltihabı azaltmağa və potensial olaraq idrak qabiliyyətinin zəifləməsini ləngitməyə kömək edə bilər".
Onun sözlərinə görə, 2021-ci ildə Molecules jurnalında dərc olunan tədqiqat yaşıl çayın bağırsaq mikrobiomuna müsbət təsir göstərdiyini və bunun nəticəsində iltihabəleyhinə qısa zəncirli yağ turşularının istehsalının artdığını göstərib.
2. Hibiskus çayı
Hibiskus çayının parlaq qırmızı rəngi onun tərkibində antosianinlər — oksidativ stressi neytrallaşdırmağa kömək edən antioksidantlar sinfinin olduğunu göstərir. Oksidativ stress isə xroniki iltihabın əsas səbəblərindən biridir.
Diyetoloq Cennifer Pallian izah edir: "Hibiskus çayı polifenollar, flavonoidlər, antosianinlər, taninlər, xlorogen və protokatexin turşuları kimi fenol turşuları, həmçinin hibiskus və hidroksilimon turşuları daxil olmaqla üzvi turşular ehtiva edir. Bu maddələr onun antioksidant təsirinə və iltihabla mübarizə qabiliyyətinə kömək edir".
Onun sözlərinə görə, 2025-ci ildə Wiley Online Library-də dərc olunan araşdırma göstərib ki, hibiskus çayı bitki mənşəli birləşmələrin bir-birini tamamlayan təsiri sayəsində orqanizmin oksidativ stressə qarşı təbii müdafiəsini gücləndirir.
3. Sarıkök çayı
Sarıkökün tərkibində kurkumin adlı güclü iltihabəleyhinə maddə var. Diyetoloq İvett Hill bildirir ki, bu maddə orqanizmdə xroniki iltihab siqnallarını zəiflədir və antimikrob xüsusiyyətlərə malikdir. Elmi məlumatlara görə, kurkumin osteoartriti olan insanlarda ağrını azaltmağa və fiziki funksiyanı yaxşılaşdırmağa kömək edə bilər — bu da onun iltihabəleyhinə təsiri ilə əlaqələndirilir.
4. Zəncəfil çayı
Zəncəfil çayında 400-dən çox təbii birləşmə, o cümlədən gingerol var. Zenker izah edir ki, bu antioksidant oksidativ stresslə mübarizə aparmağa və iltihabı azaltmağa kömək edir. Onun sözlərinə görə, bu maddə sayəsində orqanizmdə C-reaktiv zülal (CRP) kimi iltihab biomarkerinin səviyyəsi azalır.
5. Çobanyastığı çayı
Bu içki yalnız sakitləşdirici təsir göstərmir, həm də iltihabın azalmasında müəyyən rol oynaya bilər.
Materialda deyilir: "Bəzi araşdırmalar göstərir ki, çobanyastığının bitki birləşmələri orqanizmdə iltihabi reaksiyaları yumşaltmağa kömək edir və xüsusilə həzm sistemindəki iltihabı sakitləşdirmək üçün faydalı ola bilər".
Bundan əlavə qeyd olunur ki, çobanyastığı yuxunu yaxşılaşdırmağa kömək etdikdə, dolayısı ilə iltihabı da azaldır. Çünki keyfiyyətli istirahət zamanla iltihab səviyyəsinin aşağı düşməsinə təsir edir.
Məqalədə vurğulanır ki, heç bir çay iltihabı təkbaşına aradan qaldıra bilməz. Lakin bu içkilərdən hər hansı birini müntəzəm qəbul etmək orqanizmin iltihabı nəzarətdə saxlamaq qabiliyyətini dəstəkləyə bilər.
Poliqon.info
