Rusiya XİN rəhbəri Ukrayna prezidentinin çıxışını rusdilli əhaliyə qarşı hörmətsizlik kimi qiymətləndirib...
Rusiyanın xarici işlər naziri Sergey Lavrov Ukrayna prezidenti Volodymyr Zelenskyynin Munich Security Conference çərçivəsində etdiyi çıxışın onun sülhə nail olmaq istəmədiyini göstərdiyini bildirib.
Poliqon xəbər verir ki, nazir bu fikirləri “Əl-Ərəbiyyə” telekanalına müsahibəsində səsləndirib.
Lavrov vurğulayıb ki, Zelenskinin səsləndirdiyi bəyanatlar əlavə şərh tələb etmir və Ukrayna liderinin açıq şəkildə sülh istəmədiyini nümayiş etdirir. Onun sözlərinə görə, Münhendəki çıxış Kiyevin mövqeyini bir daha təsdiqləyib.
Rusiya XİN rəhbəri həmçinin Zelenskinin əvvəlki açıqlamalarını xatırladaraq qeyd edib ki, Ukrayna prezidenti vaxtilə Donbas sakinləri barədə təhqiramiz ifadələr işlədib və özünü rus mədəniyyətinə aid hesab edən şəxsləri Rusiyaya getməyə çağırıb. Lavrovun sözlərinə görə, Münhen konfransından sonra Zelenski daha sərt bəyanatla çıxış edib, Avropa və ABŞ-ni Rusiya mənşəli şəxslərin yetərincə ölkədən çıxarılmamasına görə tənqid edib və qeyri-etik ifadə işlədib.
Nazir Ukrayna prezidentinin bu açıqlamalarını rusdilli əhaliyə, eləcə də Donetsk və Luqansk bölgələrinin sakinlərinə qarşı hörmətsizlik kimi qiymətləndirib. Lavrov bildirib ki, Kiyev hakimiyyəti dövründə Donbas əhalisi ayrı-seçkiliklə üzləşib, rus dilinin istifadəsinə və pravoslav inancına məhdudiyyətlər tətbiq olunub.
Rusiya tərəfi hesab edir ki, bu cür ritorika regionda gərginliyin azaldılmasına deyil, əksinə, qarşıdurmanın dərinləşməsinə xidmət edir. Moskva rəsmiləri münaqişənin siyasi və diplomatik yollarla həllinin vacibliyini vurğulasa da, Ukrayna rəhbərliyinin son bəyanatlarının bu istiqamətdə irəliləyişə mane olduğunu iddia edirlər.
Poliqon.info
