.jpg)
"Qarabağ" və "Nyukasl" arasında Bakıda keçiriləcək Çempionlar Liqasının pley-off mərhələsinin ilk oyununun baş hakimi olacaq Espen Eskas daha əvvəl Azərbaycan millisinin matçını da idarə edib.
Sportinfo.az xəbər verir ki, norveçli referi DÇ-2022-nin seçmə mərhələsi çərçivəsində keçirilən Azərbaycan - İrlandiya oyununun baş hakimi olub.
Bakı Olimpiya Stadionunda (BOS) təşkil olunan görüş qonaqların 3:0 hesablı qələbəsi ilə başa çatıb.
Eskas bu matçda cəmi bir dəfə rəsmi xəbərdarlıq etmək məcburiyyətində qalıb. O, 88-ci dəqiqədə İrlandiya seçməsinin futbolçusu Con İqanı sarı vərəqə ilə cəzalandırıb.
Espen Eskas həmçinin 2018-ci ildə UEFA Millətlər Liqası çərçivəsində millimizin BOS-da Kosovo yığması ilə baş tutan görüşündə köməkçi hakim olub. Həmin qarşılaşma qolsuz bərabərliklə yekunlaşıb.
Maraqlıdır ki, sözügən matçda millimizin baş məşqçisi Qurban Qurbanov idi.
"Qarabağ" - "Nyukasl" oyunu fevralın 18-də keçiriləcək. Komandalar arasında cavab oyunu isə fevralın 24-də İngiltərədə baş tutacaq.
