Almaniyanın rəsmi statistika və məlumat xidmətləri üzrə mərkəzi qurumu olan Almaniya Federal Statistika Ofisi ölkə əhalisinin sayına dair yeni proqnozlarını dərc edib.
Marja.az xəbər verir ki, 2070-ci ilədək Almaniya əhalisinin 10% azalacağı gözlənilir. İndiyədək ölkə əhalisinin 2070-ci ilədək 1% azalacağı nəzərdə tutulurdu.
Ifo İqtisadi Araşdırmalar İnstitutu (Ifo) da, 2022-ci il əhali siyahıyaalınması məlumatlarına əsaslanaraq Almaniyada əhalinin 2050-ci ilə qədər 5 faiz, 2070-ci ilə qədər isə 10% azalacağını bildirib.
Ifo ölkə əhalisinin gələcəyinə dair məlumatları əhatə edən “Almaniyada Gələcək Əhali İnkişafı: Əhalinin Azalması və Yaşlanması” adlı təhlilini yayımlayıb. Destatis-in (Federal Statistika Ofisi) yenilənmiş məlumatlarına əsaslanan araşdırmada Almaniya əhalisinin qarşıdakı illərdə gözləniləndən daha sürətli şəkildə azalacağı və yaşlanacağı bildirilib. Təhlildə Almaniya əhalisinin yaxın illərdə əvvəlki proqnozlardan daha böyük azalma göstərəcəyi vurğulanıb. Belə ki, ölkə əhalisinin 2070-ci ilə qədər hazırkı səviyyə ilə müqayisədə təxminən 10 faiz azalacağı gözlənilir. Əvvəlki proqnozlarda isə bu azalmanın cəmi 1 faiz səviyyəsində qalacağı təxmin edilirdi.
Bu kəskin düzəlişin əsas səbəbi kimi 2022-ci il əhali siyahıyaalınmasının nəticələrinin Almaniyanın mövcud əhalisinin əvvəl təxmin edilən 81,9 milyondan daha az olduğunu ortaya qoyması göstərilib.
Təhlildə əhali itkisinin ölkə üzrə bərabər paylanmayacağına da diqqət çəkilib. Xüsusilə Şərqi Almaniya əyalətlərində əhalinin daha çox azalacağı, Berlin, Hamburq və Bremen kimi şəhər-əyalətlərində isə 2070-ci ilə qədər əhalinin artacağı proqnozlaşdırılır.
