Londonun şimalında qızılca xəstəliyinin alovlanması qeydə alınıb və artıq 34 hal laboratoriya şəraitində təsdiqlənib, bəzi uşaqların xəstəxanaya yerləşdirilməsi tələb olunub.
AFN.az "The Sunday Times"a istinadən xəbər verir ki, həkimlər bu vəziyyəti Londonda qızılca, parotit və məxmərək əleyhinə kombinə edilmiş QPM peyvəndinin vurulma səviyyəsinin ölkə üzrə ən aşağı göstəricilərdən birinə düşməsi ilə əlaqələndirirlər.
Bildirilir ki, bunun əsas səbəblərindən biri COVID-19 pandemiyasından sonra əhalinin peyvəndlərin effektivliyinə şübhə ilə yanaşmasıdır. Yanvar ayında Ümumdünya Səhiyyə Təşkilatı Böyük Britaniyanı qızılcanın ləğv edildiyi ölkə statusundan məhrum edib.
Birləşmiş Krallığın Səhiyyə Təhlükəsizliyi Agentliyinin proqnozlarına görə, Londondakı bu epidemiya 40 mindən 160 minə qədər insana təsir edə bilər. Məqalədə qeyd olunur ki, İngiltərədə uşaqların peyvəndlənmə səviyyəsi son on ilin ən aşağı həddinə düşüb; bura qızılca ilə yanaşı göyöskürək əleyhinə peyvəndlər də daxildir. 2024-cü ildə ölkədə 15 minə yaxın göyöskürək halı qeydə alınıb və 11 körpə vəfat edib.
Ekspertlər xatırladır ki, qızılca dünyada ən yoluxucu viruslardan biridir və bir xəstə peyvənd olunmamış 18 nəfəri yoluxdura bilər ki, bu da qripdən 12 dəfə daha yüksək yoluxuculuq deməkdir. Avropa regionunda qızılcanın yenidən yayıldığı ölkələrin sayı 12-dən 19-a yüksəlib. Peyvəndin iki dozası xəstəliyə qarşı 97 faiz ömürlük qorunma təmin edir.
