“Amerikalılar sanksiyaların qaldırılmasını müzakirə etməyə hazırdırlarsa, İran da ABŞ ilə nüvə sazişinə çatmaq üçün güzəştləri nəzərdən keçirməyə hazırdır”.
“Cebheinfo.az” xəbər verir ki, bunu İran xarici işlər nazirinin müavini Məcid Təxt-Rəvançi BBC-yə verdiyi müsahibədə bildirib.
ABŞ rəsmiləri isə dəfələrlə iddia ediblər ki, uzanan danışıqlar prosesində irəliləyişi dayandıran ABŞ deyil, İrandır. ABŞ dövlət katibi Marko Rubio bildirib ki, Prezident Donald Tramp razılaşmaya üstünlük verəcək, lakin İranla əlaqə qurmaq çox çətindir.
Tehranda BBC-yə verdiyi müsahibədə Məcid Təxt-Rəvançi deyib ki, razılaşma istədiklərini sübut etmək üçün top Amerikanın meydanındadır:
"Əgər onlar səmimidirlərsə, əminəm ki, razılaşma yolunda olacağıq".
Xatırladaq ki, Tramp nüvə proqramını məhdudlaşdırmaq üçün razılaşma əldə olunmazsa və ABŞ regionda hərbi mövcudluğunu artırmağa davam edərsə, İrana zərbə endirəcəyi ilə hədələyib.
Fevralın əvvəlində ABŞ və İran Oman körfəzində dolayı danışıqlar aparıblar və ikinci turun çərşənbə axşamı Cenevrədə keçiriləcəyini təsdiqləyən Təxt-Rəvançi "az-çox müsbət istiqamətdə irəlilədiklərini, lakin hələlik mühakimə yürütmək üçün tez olduğunu" bildirib.
Tramp da danışıqları müsbət adlandırıb. İranın xarici işlər nazirinin müavini Tehranın 60% zənginləşdirilmiş uranı durulaşdırmaq təklifini güzəştə getməyə hazır olduğunun sübutu kimi göstərdi.
