Böyük Britaniya kral ailəsinin üzvləri ölkənin digər vətəndaşları kimi qanundan üstün deyillər.
Bu barədə Kral Prokurorluq Xidmətinin direktoru Stiven Parkinson “The Sunday Times” qəzetinə müsahibəsində bildirib.
“Heç kim qanundan üstün deyil. Mənim işim qanunun icrasını təmin etməkdir və bunu qorxu və ya üstünlük göstərmədən edirəm. Maraqlı tərəfin statusu bu prosesə təsir göstərmir”, — deyə Parkinson vurğulayıb.
Onun açıqlaması Temza Vadisi polisinin Böyük Britaniya kralının qardaşı Endryu Mauntbetten-Vindzor barəsində başladığı araşdırma ilə bağlıdır. Hüquq-mühafizə orqanları onun pedofiliya ittihamı ilə ifşa olunmuş amerikalı maliyyəçi Ceffri Epşteynə məxfi məlumat ötürməsi ilə bağlı iddiaları araşdırır.
Söhbət Endryu Mauntbetten-Vindzorun hələ şahzadə və York hersoqu titullarını daşıdığı dövrdən gedir. O, 2001–2011-ci illərdə Böyük Britaniyanın beynəlxalq ticarət və investisiyalar üzrə xüsusi nümayəndəsi vəzifəsində çalışıb.
Sky News telekanalının məlumatına görə, ABŞ Ədliyyə Nazirliyinin dərc etdiyi “Epşteyn dosyesi” adlanan sənədlər toplusunda gələcək kralın qardaşının 2010-cu ilin noyabrında maliyyəçiyə Vyetnam, Sinqapur və Çin (Honqkonq və Şençjen) səfərləri barədə mesajlar göndərdiyinə dair məlumat yer alır.
The Sunday Times qeyd edir ki, əgər polis Endryu Mauntbetten-Vindzora qarşı rəsmi ittiham irəli sürərsə, o, müasir tarixdə ciddi cinayət üzrə məhkəmə qarşısına çıxarıla biləcək ilk britaniya kral ailəsi üzvü olacaq.
Fevralın 9-da Böyük Britaniya kralı III Çarlz qardaşının Epşteynlə əlaqələrinin araşdırılması çərçivəsində polisə kömək göstərməyə hazır olduğunu bəyan edib. (Mənbə: TASS)
