Russia Federasiyasında mobil rabitə operatorları və dövlət qurumları uşaq SIM-kartlarından istifadə zamanı şübhəli aktivliyi izləməyə və bu barədə dərhal valideynləri məlumatlandırmağa məcbur edilə bilərlər.
Bu barədə TASS agentliyinə müsahibəsində Federasiya Şurası yanında Rəqəmsal İqtisadiyyatın İnkişafı Şurasının sədr müavini Artyom Şeykin məlumat verib.
O vurğulayıb ki, hazırda qanun layihəsində uşaq nömrələrinin monitorinqi üçün konkret mexanizmlər hələ tam şəkildə və detallı əks olunmayıb. Buna baxmayaraq, sənəddə məhz bu yanaşma əsas götürülüb. Belə ki, uşağın nömrəsinə daxil olan qeyri-adi zənglər və ya həyata keçirilən şübhəli əməliyyatlar barədə valideynlərin avtomatik rejimdə məlumatlandırılması nəzərdə tutulur.
"Hazırda bu həllər texniki işlənmə mərhələsindədir və əlavə olaraq qanunaltı aktlar səviyyəsində və ya qanunvericiliyə ediləcək sonrakı dəyişikliklərlə təsbit oluna bilər", - deyə Federasiya Şurasının üzvü bildirib.
Qeyd edək ki, bu həftə Dövlət Duması onlayn və telefon dələduzluğu ilə mübarizəyə yönəlmiş geniş tədbirlər paketini birinci oxunuşda qəbul edib. Təklif olunan 20 təşəbbüs arasında bütün mobil cihazların IMEI nömrələrinin vahid reyestrinin yaradılması, uşaq SIM-kartlarına nəzarət mexanizminin tətbiqi, bank kartlarının sayının məhdudlaşdırılması və xarici nömrələrdən gələn zənglərin bloklanması kimi mühüm məsələlər yer alır.
