Almaniya Bundesliqasının 22-ci turu çərçivəsində Bremenin "Verder" klubu ilə Münhenin "Bavariya" komandası arasında keçirilən oyun başa çatıb. Görüş 0:3 hesabı ilə münhenlilərin xeyrinə yekunlaşıb.
Qarşılaşma Bremendə yerləşən "Vohninvest Weserstadion" stadionunda baş tutub. Oyunun baş hakimi Rostok şəhərindən olan Bastian Dankert olub.
Harri Keyn 22-ci dəqiqədə penaltini dəqiq yerinə yetirərək hesabı açıb. O, 25-ci dəqiqədə ikinci qolunu vuraraq dubla imza atıb. Üçüncü qolu isə 70-ci dəqiqədə Leon Qoretska vurub.
Bu nəticədən sonra "Verder" 19 xalla Almaniya çempionatının yüksək divizionunun turnir cədvəlində 16-cı pillədə qərarlaşıb. "Bavariya" isə 57 xalla Bundesliqanın lideridir.
Növbəti turda bremenlilər fevralın 22-də səfərdə "Sankt-Pauli" ilə qarşılaşacaqlar. Münhen təmsilçisi isə fevralın 21-də doğma meydanda "Ayntraxt"ı qəbul edəcək.
