Bu gün Azərbaycan ədəbiyyatının görkəmli nümayəndəsi, Xalq şairi Bəxtiyar Vahabzadənin anım günüdür və onun milli ədəbi fikrin inkişafında oynadığı mühüm rol dərin ehtiramla yad edilir.Missiya.Az xatırladır ki, Bəxtiyar Vahabzadə 16 avqust 1925-ci ildə anadan olub, bütün ömrünü Azərbaycan ədəbiyyatının inkişafına, milli-mənəvi dəyərlərin qorunmasına və ana dilinin təbliğinə həsr edib. O, Azərbaycan Dövlət Universitetinin filologiya fakültəsini bitirmiş, daha sonra həmin ali məktəbdə uzun illər müəllim, dosent və professor kimi fəaliyyət göstərib, elmi-pedaqoji fəaliyyəti ilə yanaşı ədəbiyyatşünaslıq sahəsində də araşdırmalar aparmışdır.
Şairin yaradıcılığı ideya və məzmun baxımından olduqca zəngindir. Onun poeziyasında vətənpərvərlik, istiqlal düşüncəsi, ana dili sevgisi, milli kimlik və azadlıq ideyaları əsas yer tutub. “Gülüstan” poeması Azərbaycan ədəbi fikrində mühüm hadisə kimi qiymətləndirilərək milli özünüdərk prosesinə ciddi təsir göstərib. Həmçinin “Ana dili”, “Azərbaycan”, “Latın dili”, “Vətən marşı” kimi şeirləri geniş oxucu auditoriyası tərəfindən maraqla qarşılanıb illər boyu aktuallığını qoruyub.
Bəxtiyar Vahabzadə dramaturgiya sahəsində də məhsuldar fəaliyyət göstərib. “İkinci səs”, “Vicdan”, “Yağışdan sonra”, “Fəryad” kimi pyesləri müxtəlif illərdə səhnələşdirilərkən ictimai-mənəvi problemlərə toxunduğu üçün geniş rezonans doğurmuşdur. Sənətkarın yaradıcılığında lirik, fəlsəfi və ictimai motivlər paralel şəkildə inkişaf edib və bütövlükdə milli ruhun ifadəsinə xidməti özündə əks etdirib.
Sənətkar ölkənin ictimai-siyasi həyatında da fəal mövqeyi ilə seçilirdi. İstər milli azadlıq ideyalarını açıq şəkildə müdafiə etməsi, istərsə də Azərbaycan Respublikasının Milli Məclisinin deputatı kimi fəaliyyəti burada göstərilə bilər. Onun dövlət və cəmiyyət qarşısındakı xidmətləri yüksək qiymətləndirilərək “Xalq şairi” fəxri adına layiq görülmüş və “Şöhrət” və “İstiqlal” ordenləri ilə təltif olunmuşdu.
Bəxtiyar Vahabzadə 13 fevral 2009-cu ildə vəfat edib və Bakı şəhərində I Fəxri xiyabanda dəfn olunub. Onun ədəbi irsi Azərbaycan ədəbiyyatının qızıl fondunun mühüm hissəsi kimi dəyərləndirilir və milli düşüncənin formalaşmasında xüsusi yer tutur.
İlahə Qənbərli
Missiya.Az
