BAKI, 13 fevral. TELEQRAF
ABŞ Prezidenti Donald Tramp gələn həftə “Sülh Şurası”nın ilk rəsmi iclasında Qəzza üçün çoxmilyard dollarlıq bərpa planını elan edəcək və Fələstin anklavı üçün BMT-nin sanksiya verdiyi sabitləşdirmə qüvvələrinin yerləşdirilməsi ilə bağlı detalları açıqlayacaq.
Teleqraf xəbər verir ki, "Reuters"in məlumatına görə, bu barədə iki yüksəkvəzifəli ABŞ rəsmisi bildirib.
Məlumata görə, fevralın 19-da Vaşinqtonda keçiriləcək iclasda ən azı 20 ölkənin nümayəndə heyətinin, o cümlədən bir çox dövlət və hökumət başçılarının iştirakı gözlənilir. İclasa Donald Tramp sədrlik edəcək. Rəsmilər qeyd ediblər ki, “Sülh Şurası”nın ilk toplantısı ilə bağlı bu planların detalları indiyədək açıqlanmamışdı.
Tramp yanvarın 23-də İsveçrənin Davos şəhərində “Sülh Şurası”nın yaradılması ilə bağlı sənədləri imzalayıb. Şuranın yaradılması BMT Təhlükəsizlik Şurasının qətnaməsi ilə dəstəklənib və bu, Trampın Qəzza planının bir hissəsidir. Türkiyə, Misir, Səudiyyə Ərəbistanı və Qətər kimi Yaxın Şərq ölkələri, eləcə də İndoneziya kimi böyük inkişaf etməkdə olan dövlətlər şuraya qoşulub. Bununla yanaşı, bəzi qlobal güclər və ABŞ-nin ənənəvi Qərb müttəfiqləri daha ehtiyatlı mövqe tutublar. İsrailin baş naziri Benyamin Netanyahu isə Vaşinqtona səfəri zamanı İsrailin də şuraya qoşulduğunu bildirib.
ABŞ rəsmilərinin sözlərinə görə, iclasın əsas mövzularından biri Trampın Qəzza üçün çoxmilyard dollarlıq fondun yaradıldığını elan etməsi olacaq. Bu fonda şurada təmsil olunan ölkələrin maliyyə töhfələrinin daxil ediləcəyi bildirilir. Rəsmilər qeyd ediblər ki, ABŞ konkret ianə tələbləri irəli sürməyib və təşəbbüslər tərəfdaşlardan gəlib.
Qəzzaya yerləşdirilməsi planlaşdırılan Beynəlxalq Sabitləşdirmə Qüvvələrinin formalaşdırılması Trampın sentyabrda açıqladığı planın əsas mərhələlərindən biri hesab olunur. Rəsmilərin bildirdiyinə görə, bir neçə ölkə bu qüvvələrə minlərlə hərbçi ayırmağa hazırlaşır və onların yaxın aylarda bölgəyə göndərilməsi gözlənilir.
Plan çərçivəsində əsas məsələlərdən biri HƏMAS döyüşçülərinin tərksilah edilməsidir. Sənədə görə, silahlarını təhvil verərək dinc birgəyaşayışa razılaşan HƏMAS üzvlərinə amnistiya veriləcək. Qəzzanı tərk etmək istəyənlərə isə qəbul edən ölkələrə təhlükəsiz keçid təmin olunacaq.
İclaslarda həmçinin Qəzzanın gündəlik mülki idarəçiliyini HƏMAS-dan təhvil almaq üçün yaradılmış Qəzza İdarəçiliyi üzrə Milli Komitənin fəaliyyəti, humanitar yardım məsələləri və Qəzza polisi ilə bağlı hesabatların da təqdim olunacağı bildirilib.
