İran prezidenti Məsud Pezeşkyan fevralın 11-də İranın nüvə silahı inkişaf etdirmək istəmədiyini sübut etmək üçün nüvə obyektlərini “istənilən yoxlamaya” açmağa hazır olduğunu bildirib.
İran prezidenti həmçinin Tehranın İranın nüvə proqramının tamamilə dinc xarakter daşıdığı mövqeyini bir daha təkrarlayıb. O qeyd edib ki, İran dəfələrlə nüvə silahı axtarmadığını və “istənilən yoxlama formasına tam hazırdır.
Pezeşkyan həmçinin əlavə edib ki, ABŞ və Avropa öz ritorikası və mövqeləri ilə danışıqların nəticəyə çatmasına mane olan “yüksək etimadsızlıq divarı” qurublar. Lakin o bildirib ki, İran və ABŞ “İslam İnqilabının Liderinin müəyyən etdiyi qırmızı xətlərə uyğun olaraq” yaxın günlərdə danışıqları davam etdirməyi planlaşdırırlar.
Qeyd edək ki, fevralın 11-də İsrailin Baş naziri Binyamin Netanyahu ilə görüşdükdən sonra ABŞ prezidenti Donald Tramp “Truth Social”da İranla bağlı vəziyyətə diplomatik həll yolu axtarmağa davam edəcəyini açıqlayıb. “Razılaşmanın əldə edilib-edilməyəcəyini görmək üçün İranla danışıqları davam etdirməkdə israr etməyimdən başqa heç bir yekun qərar verilməyib. Əgər belədirsə, Baş nazirə bunun ən yaxşı seçim olacağını bildirmişəm. Əks təqdirdə, sadəcə nəticənin necə olacağını görməliyik”, – deyə o yazıb. Tramp həmçinin xatırladıb ki, Tehranın ötən il diplomatik razılaşmanı rədd etməsi ABŞ-ın İranın nüvə obyektlərinə zərbələr endirməsinə səbəb olub.
//Samir Qurbanov, Editor.az
