Polşa parlamentinin aşağı palatası (Seym) Ukrayna Silahlı Qüvvələrinin tərəfində döyüşən Polşa vətəndaşlarına qarşı cinayət təqibini aradan qaldıran "Ukraynanın azadlığı və müstəqilliyini müdafiə edən könüllülərin cəzalandırılmaması haqqında qanun" layihəsini ikinci oxunuşda müzakirə edərək üçüncü oxunuşa göndərib.
AFN.az xəbər verir ki, qanun layihəsinin mətninə hakim Vətəndaş Koalisiyası və sağçı "Konfederasiya" birliyi tərəfindən yeni düzəlişlər təklif edilib. Hakim koalisiya amnistiyanın daha çox insanı əhatə etməsi üçün qanunun qüvvəyə minmə müddətinin prezident tərəfindən imzalandıqdan üç ay sonraya təxirə salınmasını, "Konfederasiya" isə polşalıların Ukraynaya verdiyi hərbi andın hüquqi cəhətdən etibarsız sayılmasını təklif edib.
Mövcud Polşa qanunvericiliyinə görə, müvafiq icazə almadan xarici orduda xidmət etmək beş ilə qədər həbs cəzası ilə nəticələnə bilər. Lakin reallıqda ölkə prokurorluğu Ukraynada döyüşən polşalılara qarşı qəsdən cinayət təqibi həyata keçirmir. Yeni qanun layihəsi bu vəziyyəti rəsmiləşdirərək 2022-ci il fevralın 24-dən etibarən Ukrayna ordusunda xidmət etmiş şəxslərin əməllərini "bağışlanmış və unudulmuş" elan etməyi nəzərdə tutur.
Amnistiya yalnız Polşa tərəfindən tanınan rəsmi Ukrayna hərbi birləşmələrinə şamil olunacaq, muzdlu dəstələrdə xidmət isə yenə də cəzalandırılacaq. Könüllülər vətənə qayıtdıqdan sonra Müdafiə Nazirliyinə xidmət müddəti və yeri barədə məlumat verməli olacaqlar, bu məlumatlar isə "məxfi" statusu ilə qorunacaq.
