Bakı, 11 fevral, AZƏRTAC
ABŞ-ın Vitse-prezidentinin Azərbaycana səfəri çərçivəsində iki ölkə arasında Strateji Tərəfdaşlıq haqqında Xartiyanın imzalanması Azərbaycan–ABŞ münasibətlərində keyfiyyətcə yeni mərhələnin əsasını qoyub. Azərbaycan və ABŞ prezidentlərinin ötən ilin avqustunda Vaşinqtonda, cari ilin yanvarında isə Davos İqtisadi Forumu çərçivəsində keçirdikləri görüşlər iki ölkə arasında fəal siyasi dialoqun və əməkdaşlığın yüksələn xətlə inkişaf etdiyini göstərir.
Bu fikirləri AZƏRTAC-a açıqlamasında Milli Məclisin Gənclər və idman komitəsinin sədri Şahin İsmayılov bildirib.
Qeyd edib ki, Strateji Tərəfdaşlıq haqqında Xartiyanın imzalanması ilə ölkələrimiz arasında münasibətlər çoxşaxəli və uzunmüddətli strateji əməkdaşlıq mərhələsinə qədəm qoyur. Mövcud reallıqlar fonunda bu mərhələ həm regional, həm də qlobal miqyasda mühüm geosiyasi və geoiqtisadi əhəmiyyət kəsb edir. Onun sözlərinə görə, Cənubi Qafqazda postmünaqişə mərhələsinin formalaşdığı bir dövrdə beynəlxalq tərəfdaşlarla əlaqələndirilmiş fəaliyyət regional sabitliyin möhkəmləndirilməsi baxımından zəruridir. Bu xüsusda Azərbaycan–ABŞ əməkdaşlığı regionda davamlı sülhün təşviqində və təhlükəsizlik mexanizmlərinin formalaşdırılmasında önəmli rol oynayacaq.
Komitə sədri vurğulayıb ki, sənəddə müdafiə və hərbi-texniki sahədə əməkdaşlığın genişləndirilməsi xüsusi yer tutur. Müdafiə sənayesi, antiterror fəaliyyətinin genişləndirilməsi, kibertəhlükəsizlik, mühüm infrastruktur obyektlərinin qorunması kimi istiqamətlərdə ABŞ ilə tərəfdaşlıq ölkəmiz üçün olduqca əhəmiyyətlidir. Eyni zamanda, humanitar minatəmizləmə sahəsində nəzərdə tutulan əməkdaşlıq işğaldan azad edilmiş ərazilərin reinteqrasiyası və Böyük Qayıdış prosesinin sürətləndirilməsinə mühüm töhfə verəcək. Onun fikrincə, müdafiə və hərbi-texniki sahədə əməkdaşlığın genişləndirilməsi Azərbaycanın milli təhlükəsizlik sisteminin və regionda sabitliyin daha da möhkəmləndirilməsinə xidmət edir.
Şahin İsmayılov regional bağlantıların inkişafının Azərbaycan–ABŞ strateji tərəfdaşlığının mühüm istiqamətlərindən biri olduğunu da diqqətə çatdırıb: “ABŞ-ın Vitse-prezidenti ilə birgə mətbuata bəyanatında dövlətimizin başçısının da qeyd etdiyi kimi, TRIPP layihəsi ölkəmizin iki hissəsini birləşdirməklə yanaşı, Azərbaycan, Ermənistan və digər qonşu ölkələrin ərazisi vasitəsilə Asiya ilə Avropanı birləşdirəcək etibarlı, təhlükəsiz və böyükmiqyaslı daşımalar dəhlizidir. Bu isə öz növbəsində regionda sülh sahəsində əldə olunmuş nəticələrin möhkəmləndirilməsinə və qlobal əməkdaşlıq üçün önəmli məkana çevrilməsinə xidmət edəcək. Regional iqtisadi inteqrasiyada mühüm rol oynayacaq bu layihə Azərbaycanda iqtisadiyyatın şaxələndirilməsi istiqamətində görülən işlərə və ölkəmizin beynəlxalq ticarət sistemində rolunun artmasına töhfə verəcək”.
Enerji sektorunun Azərbaycan–ABŞ münasibətlərinin əsas istiqamətlərindən biri olduğunu bildirən komitə sədri qeyd edib ki, ölkələrimiz uzun illərdir bu sahədə səmərəli əməkdaşlıq edir və Xartiyada da vurğulandığı kimi, enerji əməkdaşlığını daha da genişləndirmək niyyətindədirlər. Bu gün Azərbaycan 11-i NATO üzvü olmaqla 16 ölkənin enerji təhlükəsizliyində mühüm rol oynayır. Bu baxımdan, Azərbaycan ilə ABŞ arasında enerji sahəsində tərəfdaşlıq, təchizat marşrutlarının şaxələndirilməsi, interkonnektor layihələrinin inkişafı və digər istiqamətlərdə əməkdaşlıq beynəlxalq miqyasda enerji təhlükəsizliyinin möhkəmləndirilməsinə xidmət edir.
Şahin İsmayılov vurğulayıb ki, Prezident İlham Əliyevin müəyyənləşdirdiyi çoxvektorlu xarici siyasət strategiyası nəticəsində Azərbaycan qlobal güc mərkəzləri ilə balanslaşdırılmış və qarşılıqlı faydalı münasibətlər quraraq beynəlxalq sistemdə mövqelərini möhkəmləndirir, milli maraqlarını etibarlı şəkildə təmin edir və regional əməkdaşlıq platformalarında mühüm tərəfdaş kimi çıxış edir. Onun sözlərinə görə, Azərbaycan ilə ABŞ arasında münasibətlərin strateji tərəfdaşlıq səviyyəsinə yüksəlməsi bunun əyani təsdiqi, ölkəmizin geniş coğrafiyada aparıcı aktor kimi qəbul olunduğunun göstəricisidir.
