Son zamanlar amerikalı maliyyəçi Ceffri Epşteyn işi üzrə açıqlanan materiallarda COVID-19 pandemiyası ilə əlaqədar 3 il əvvəl təhlükəli virusların yayılmasının modelləşdirilməsi ilə bağlı aşkar edilən müzakirələrin aparıldığı məktub dünya gündəmini zəbt edib. Xəstəliyin uydurulmuş ssenari olması barədə iddialar səsləndirilir. Pandemiya dövründə bir çox ölkələr COVID-19 səbəbilə quru sərhədlərini bağlamış və ya ciddi məhdudlaşdırmışdı, sonradan məhdudiyyətlər aradan qaldırıldı. Azərbaycanda isə xüsusi karantin rejimi hələ də ləğv edilməyib.
Milli Məclisin deputatı Aydın Mirzəzadə Pravda.az-a açıqlamasında deyib ki, Azərbaycanın quru sərhədləri 2020-ci ildə COVID-19 təhlükəsi ilə bağlı olaraq bağlanıb və ötən dövr ölkənin düzgün qərar verdiyini göstərib: “Bu bizi daha böyük problemlərdən xilas edib. Ermənistandan başqa digər ölkələrlə hər hansısa problemimiz yoxdur, indi də mövcud deyil. Ümid edirəm, sülh müqaviləsi bağlanandan sonra da Ermənistanla da münasibətlərimiz normal qonşuluq müstəvisinə keçəcək. COVID-19 təhlükəsi, demək olar ki, dayanıb. Bununla belə yenə nəzərdən qaçırmaq olmaz. Sərhədlərimiz yaxınlığında çox ağrılı proseslər gedir. Rusiya-Ukrayna müharibəsi, İranda baş verən hadisələr Azərbaycanı quru sərhədlərini bağlı saxlamağa məcbur edir. Hava yolu ilə sərhədlər açıqdır, hansısa problem yaranmır. Mümkündür ki, müəyyən hallar nəzərə alınaraq, müəyyən kateqoriya insanlar üçün sərhədlər açıla bilər. COVID-19 təhlükəsi tam aradan götürülməyib, ona görə də hər bir ölkə, o cümlədən Azərbaycan da bunun yenidən baş qaldırma ehtimalına qarşı qabaqlayıcı tədbirlərini görür. Bu xəstəliyin müalicəsi ilə məşğul olan tibb işçiləri şübhəsiz ki, yaxşı maaş almalıdırlar. Qərbdə bir nəfərin adı ilə dövran edən hadisələrə isə ancaq mütəxəssislər rəy bildirə bilərlər”.
Qeyd: Azərbaycanda xüsusi karantin rejimini 2026-cı il 1 aprelədək uzadılıb.
Şəhanə Quliyeva
