ain.az bildirir, Bizimyol portalına istinadən.
Qədim Petra şəhərində arxeoloqlar su təchizatı sisteminin yeni tədqiqatı zamanı təxminən 116 metr uzunluğunda nadir qurğuşun su borusu aşkar ediblər. Tapıntı Ayn-Bark su xəttinin öyrənilməsi zamanı üzə çıxıb və antik dövrdə şəhərdə tətbiq olunan hidromühəndislik həllərinin nə qədər mürəkkəb və düşünülmüş olduğunu göstərir.
Bizimyol.info xəbər verir ki, "Interesting Engineering" nəşrinin məlumatına görə, alimlər ümumilikdə doqquz boru xətti müəyyən ediblər ki, onların bir qismi indiyədək məlum deyildi. Aparılan araşdırma ilk dəfə olaraq Petranın su sisteminin necə işlədiyini daha dəqiq anlamağa, şərti rekonstruksiyalardan real təsəvvürə keçməyə imkan verib.
Tədqiqatçıların bildirdiyinə görə, Ayn-Bark su kəməri suyu iki əsas kanal vasitəsilə ötürürdü. Bu kanallardan biri qurğuşundan hazırlanmışdı. Ellinistik mühəndislik ənənələrinə xas olan bu material suyun təzyiq altında daşınmasına imkan verir və hündürlük fərqləri olan mürəkkəb dağlıq relyef şəraitində səmərəli işləyirdi.
Quraq ərazidə yerləşən və qayalara oyulmuş memarlığı ilə tanınan Petra məhz yaxşı planlaşdırılmış su toplama və paylama sistemi sayəsində tam hüquqlu şəhər mərkəzinə çevrilə bilmişdi. Təxminən 2500 kvadratmetr ərazidə aparılan qazıntılar zamanı arxeoloqlar həmçinin hündür bəndli bir su anbarı, iki sistern və qayaların içərisinə oyulmuş yağış suları kanalları ilə birləşən yeddi hovuz aşkar ediblər.
Alimlərin xüsusi diqqətini çəkən məqamlardan biri də bəndlərdən birinin pilləli quruluşu olub. Bu konstruksiya suyun təzyiqini azaldaraq tikilinin davamlılığını artırırdı ki, bu da qədim mühəndislərin hidravlika sahəsində dərin biliklərə malik olduğunu göstərir. Son mərhələdə isə su şəhər daxilində terrakota borular və açıq kanallar vasitəsilə paylanırdı.
Tədqiqatçıların fikrincə, qurğuşundan hazırlanmış su təchizatı sistemi Petranın inkişafının ilkin mərhələsində həlledici rol oynayıb, Böyük Məbədə, bağlara və hovuzlara suyun çatdırılmasını təmin edib. Daha sonralar isə texniki xidmətin çətinliyinə görə qurğuşundan imtina edilərək, daha sadə terrakota materialına keçilmiş ola bilər.
Arxeoloqlar antik dünyanın ən mürəkkəb hidrosistemlərindən birinin su marşrutunu və işləmə prinsiplərini tam bərpa etmək üçün Ayn-Bark su kəməri və ətraf ərazilərdə tədqiqatları davam etdirməyi planlaşdırırlar.
Qadir, Bizimyol.info
Sonrakı hadisələr barədə daha çox məlumat almaq üçün ain.az saytını izləyin.
