Qara dəniz sahilində yerləşən Mamaya kurortunun çimərliyində naməlum pilotsuz uçuş aparatının fraqmentləri tapılıb...
Poliqon xəbər verir ki, Rumıniyanın Qara dəniz sahilində, Mamaya kurortunun çimərliyində pilotsuz uçuş aparatına (PUA) məxsus olduğu ehtimal edilən metal qalıqlar aşkarlanıb. Bu barədə Rumıniya Sahil Mühafizəsinin nümayəndələri məlumat verib.
Məlumata görə, dalğalar tərəfindən sahilə atılan metal fraqmentləri təsadüfən ərazidən keçən bir şəxs aşkar edib. O, dərhal fövqəladə xidmətlərə məlumat verib. Hadisə yerinə polis əməkdaşları cəlb olunub, ərazi mühasirəyə alınıb və təhlükəsizlik tədbirləri gücləndirilib.
Rumıniyanın müdafiə naziri Radu Mirutsə Antena 3 telekanalına verdiyi müsahibədə bildirib ki, tapılan qalıqların öyrənilməsinə Müdafiə Nazirliyinin mütəxəssisləri və dövlət təhlükəsizliyi qurumlarının ekspertləri cəlb olunub. Onun sözlərinə görə, insidentin mənşəyi və pilotsuz aparatın hansı ölkəyə və ya struktura aid olması məsələsi xüsusi diqqətlə araşdırılır.
Nazir əlavə edib ki, Konstansa vilayətinin prokurorluğu artıq rəsmi istintaqa başlayıb. Araşdırma çərçivəsində qalıqların texniki xüsusiyyətləri, mümkün uçuş trayektoriyası və Qara dəniz regionunda mövcud təhlükəsizlik riskləri qiymətləndiriləcək.
Qeyd edək ki, son dövrlərdə Qara dəniz hövzəsində pilotsuz uçuş aparatları ilə bağlı insidentlər regional təhlükəsizlik baxımından xüsusi həssaslıq doğurur və NATO üzvü olan Rumıniyada bu cür hadisələr ciddi nəzarət altında araşdırılır.
Poliqon.info
