BAKI, TurkicWorld, Orxan Qədirzadə
ABŞ vitse-prezidenti Cey di Vans bəyan edib ki, İranla hər hansı danışıqlarda "qırmızı xəttlərin" haradan keçməsinə dair yekun qərar müstəsna olaraq prezident Donald Trampa məxsusdur.
TurkicWorld xəbər verir ki, bu açıqlama Vaşinqtonda Tehranın nüvə silahına sahib olma ehtimalı ətrafında mübahisələrin kəskinləşdiyi bir vaxtda verilib.
Hazırda Ağ Ev daxilində İranla bağlı iki fərqli cəbhə formalaşıb. "Şahinlər" adlanan qrup Tehranın nüvə və raket potensialını darmadağın etmək üçün qətiyyətli hərbi zərbələrin tərəfdarıdır. Bu cəbhəyə Müdafiə naziri Pit Heqset və Dövlət katibi Marko Rubio başçılıq edir. Digər tərəfdə isə diplomatik yolla razılaşma əldə etməyə çalışan və hərbi gücü yalnız təzyiq vasitəsi kimi görən "Göyərçinlər" qrupu yer alır. Bu qrup prezidentin xüsusi nümayəndəsi Stiv Vitkoff və Trampın kürəkəni Cared Kuşner tərəfindən təmsil olunur.
Hərbi ssenarilər "Avraam Linkoln" aviadaşıyıcı qrupu və strateji bombardmançı təyyarələr vasitəsilə İranın ballistik raket obyektlərinə və nüvə mərkəzlərinə önləyici zərbələri nəzərdə tutur. Lakin diplomatik qanad xəbərdarlıq edir ki, hərbi müdaxilə İranın Hörmüz boğazını bağlamasına və dünya bazarında neftin qiymətinin 200 dollara qədər yüksəlməsinə səbəb ola bilər. Gələn həftə Trampın İsrail Baş naziri Benyamin Netanyahu ilə Vaşinqtonda planlaşdırılan görüşü bu mürəkkəb geosiyasi düyünün necə açılacağına aydınlıq gətirəcək.
