İngiltərə Premyer Liqasının ulduz futbolçusu Cek Qriliş üçün 2025/2026 mövsümü vaxtından əvvəl başa çatıb. Mövsümün əvvəlində "Mançester Siti"dən "Everton"a icarəyə verilən 30 yaşlı cinah oyunçusu ayağındakı zədə səbəbindən əməliyyat olunduğunu və qalan matçlarda iştirak edə bilməyəcəyini açıqlayıb.
"Əvvəlkindən daha güclü qayıdacağam"
Qriliş "Instagram" hesabından xəstəxana çarpayısından foto paylaşaraq azarkeşlərlə vidalaşıb:
"Mövsümün belə bitməsini istəmirdim, amma futbol budur. Əvvəlkindən daha formada və güclü qayıdacağımdan əminəm. Bu inanılmaz kluba gəldiyim gündən bəri gördüyüm dəstək mənim üçün dünyalara bərabərdir. Komanda yoldaşlarımı sonuna qədər dəstəkləyəcəyəm".
"Everton"dakı uğurlu performansı
Devid Moyezin rəhbərliyi altında yenidən formasını bərpa edən Qriliş "Toffees" heyətində keçirdiyi 20 oyunda 2 qol və 6 məhsuldar ötürmə ilə yadda qalıb. Bu zədə onun təkcə klub karyerasına deyil, həm də 2026-cı il Dünya Çempionatında İngiltərə millisinin heyətinə düşmək ümidlərinə ciddi zərbə vurub.
Həkimlər Qrilişin ayağındakı sümük çatının (stress fracture) tam sağalması üçün uzunmüddətli reabilitasiya kursu keçməli olduğunu bildirirlər. "Everton" azarkeşləri tərəfindən çox sevilən futbolçunun icarə müqaviləsinin sonunda "Mançester Siti"yə qayıdıb-qayıtmayacağı isə hələlik sual altındadır.
