Müəllif: Tamara Mustafayeva, Banco.az
“Stellantis NV” şirkəti 2025-ci ilin son rübünə dair konsolidə edilmiş göndəriş göstəricilərini açıqlayıb.
Banco.azxəbər verir ki, şirkətin yaydığı məlumata əsasən, dilerlərə, distribütorlara, eləcə də birbaşa pərakəndə və korporativ müştərilərə təhvil verilən nəqliyyat vasitələrinin ümumi həcmini əks etdirən konsolidə edilmiş göndərişlər 31 dekabr 2025-ci il tarixində başa çatan üç aylıq dövrdə 9 faiz artım göstərib.
Qeyd olunan dövrdə konsolidə edilmiş göndərişlərin həcmi 1,5 milyon ədəd səviyyəsində olub. Artımda Şimali Amerikada qeydə alınan güclü göstəricilər həlledici rol oynayıb, Cənubi Amerika, eləcə də Yaxın Şərq və Afrika regionlarında müşahidə olunan göndəriş artımları isə ümumi yüksəlişi dəstəkləyib.
Şimali Amerikada 2025-ci ilin dördüncü rübündə göndərişlər 2024-cü ilin eyni dövrü ilə müqayisədə təxminən 127 min ədəd artaraq illik əsasda 43 faizlik böyümə nümayiş etdirib. Bu nəticə əvvəlki ildə həyata keçirilmiş ehtiyatların azaldılması təşəbbüsündən sonra ehtiyat dinamikasının normallaşmasının yaratdığı təsiri və regiondakı artan fəallığı əks etdirib.
Region üzrə 2025-ci ilin dördüncü rübündə qəbul edilən sifarişlər illik müqayisədə təxminən 150 faiz artıb. Bu yüksəliş əsasən “Jeep”, “Ram” və “Dodge” markalarının yeni və yenilənmiş məhsul çeşidlərinin bazara çıxarılması ilə əlaqədar olub.
Bizi sosial şəbəkələrdən izləyin!!
