Azərbaycan Respublikasının Milli Məclisi sahibkarlığın inkişafına dəstək məqsədilə “Sahibkarlıq sahəsində aparılan yoxlamaların dayandırılması haqqında” Qanuna mühüm dəyişiklik edib. Prezident tərəfindən təsdiqlənən bu qərarla biznes mühitindəki güzəştli dövr daha da uzadılıb.
Dəyişikliyə əsasən, qanunun 1-ci maddəsində nəzərdə tutulmuş müddət yenilənib. Belə ki, sahibkarlıq sahəsində yoxlamaların dayandırılması müddəti "2026-cı il" sözündən "2027-ci il" sözü ilə əvəz edilib. Bu isə o deməkdir ki, qanunla müəyyən edilmiş istisna hallar (vergi yoxlamaları, insanların həyat və sağlamlığına təhlükə yaradan hallar və s.) xaricində yoxlamalara tətbiq edilən moratorium daha bir il qüvvədə qalacaq.
Sözügedən qanun dəyişikliyi 2026-cı il yanvarın 1-dən etibarən hüquqi qüvvəyə minmiş hesab olunur. Bu addım ölkədə investisiya cəlbediciliyinin artırılması və sahibkarların inzibati müdaxilələrdən qorunması məqsədi daşıyır.
Maddə 1. “Sahibkarlıq sahəsində aparılan yoxlamaların dayandırılması haqqında” Azərbaycan Respublikası Qanununun 1-ci maddəsində “2026-cı” sözləri “2027-ci” sözləri ilə əvəz edilsin.Maddə 2. Bu Qanun 2026-cı il yanvarın 1-dən tətbiq edilir.
