Texnologiya və innovasiya sahəsində qadınların rolu dünyada sürətlə artır. Bu prosesdən Azərbaycan da kənarda qalmır. WomenInTech platformasının 7 fevral 2026-cı il tarixli yazısında Bakıda fəaliyyət göstərən qadın sahibkarlar və texnologiya liderləri IT sektorunda qadınların artan təsirindən, qarşılaşdıqları stereotiplərdən və bu maneələri necə aşdıqlarından danışırlar.
Məqalədə vurğulanır ki, IT və texnologiya uzun illər kişi dominantlı sahə kimi qəbul edilsə də, Azərbaycanda qadınlar bu stereotipi real nəticələrlə dəyişməyə başlayıblar.
Baku Design Academy-nin qurucusu və direktoru Aysel Gülməmmədova bildirir ki, onun IT sahəsinə gəlişi təhsillə bağlı olub. Təhsil və texnologiyanın gələcək peşələri formalaşdırdığını görən Gülməmmədova akademiyanı beynəlxalq sertifikatlar və qlobal standartlara uyğun proqramlar üzərində qurub. Onun sözlərinə görə, qadın liderlərə qarşı şübhələr mövcud olsa da, “stereotiplərlə mübarizənin ən təsirli yolu nəticə göstərməkdir”.
WomenInTech yazısında qeyd olunur ki, qadınların IT-də qarşılaşdığı əsas çətinliklərdən biri strateji və texniki müzakirələrdə ciddiyə alınmamaqdır. Aysel Gülməmmədova bu maneələri peşəkarlığa investisiya, güclü komandalar qurmaq və ölçülə bilən nəticələr yaratmaqla aşdığını vurğulayır.
Məqalədə yer alan digər müsahib Safavy platformasının həmtəsisçisi və baş direktoru Könül Quliyeva isə IT sahəsinə təhsil və innovasiya layihələri vasitəsilə daxil olduğunu bildirir. Dörd uşaq anası olan Quliyeva qadınların, xüsusilə anaların biznes və texnologiyada uğurlu ola bilməyəcəyi barədə düşüncələrin hələ də mövcud olduğunu deyir. Onun fikrincə, bu yanaşmanın qarşısını almağın yolu davamlı öyrənmək, nəticə göstərmək və uzunmüddətli hədəflərə fokuslanmaqdır.
WomenInTech yazısında xüsusi vurğulanır ki, Azərbaycanda qadınların IT sahəsində qarşılaşdığı əsas problemlərdən biri özünə inamın zəifliyi və mentorluq imkanlarının məhdudluğudur. Quliyeva bu boşluğu doldurmaq üçün qadınlar və gənclər üçün mentorluq və təhsil proqramları yaratdığını qeyd edir.
Hər iki müsahibin ortaq tövsiyəsi isə belədir: titul yox, bacarıq önəmlidir; kiçikdən başlamaqdan qorxmaq lazım deyil; inkişaf komfort zonasından kənarda baş verir.
WomenInTech platformasının bu yazısı göstərir ki, Azərbaycanda qadınlar təkcə IT sektoruna daxil olmur, eyni zamanda bu sahənin gələcəyini formalaşdıran əsas aktorlardan birinə çevrilirlər.
Elbəyi Həsənli. Sürix
