Türkiyənin ASELSAN şirkəti “World Defense Show 2026” (WDS-2026) sərgisində müasir və çoxsahəli təhdid mühitinin tələblərinə cavab verən, qarşılıqlı işləyə bilən sistemlərdən ibarət geniş məhsul portfelini nümayiş etdirir.
ASELSAN-dan “Poliqon”a verilən məlumata görə, şirkətin qabaqcıl texnologiyaları təkcə ayrı-ayrı platformalarla məhdudlaşmır, əksinə, müasir silahlı qüvvələr üçün situasiya məlumatlılığını, sağqalma qabiliyyətini və əməliyyat effektivliyini artıran dayanıqlı, inteqrasiya olunmuş və miqyaslana bilən müdafiə arxitekturaları təqdim edir.
ASELSAN-ın WDS-2026-da nümayiş etdirdiyi əsas həllərdən biri SİPER uzaqmənzilli və KORKUT çox qısamənzilli hava hücumundan müdafiə sistemləri, GÜRZ 200B taktiki hava və raketdən müdafiə sistemi, eləcə də İHTAR antidron vasitəsi kimi sistemləri özündə birləşdirən “Polad Qübbə” (ÇELİKKUBBE) çoxqatlı hava və raketdən müdafiə arxitekturasıdır. Sözügedən sistemlər ASELSAN-ın raketlərdən tutmuş pilotsuz platformalara qədər geniş spektrli hava təhdidlərinə qarşı inteqrasiya olunmuş və laylı müdafiə konsepsiyası əsasında formalaşdırdığı kompleks yanaşmanı əks etdirir.
ASELSAN, eyni zamanda WDS-2026 sərgisində Cənubi Koreyanın zirehli texnika istehsalçısı Hanwha Aerospace şirkətinin yeni nəsil 8×8 “Tigon” zirehli döyüş maşını üzərində inteqrasiya edilmiş SEDA 100 atəşi aşkarlama sistemini də nümayiş etdirir.
Elektron müharibə sahəsində ASELSAN KORAL 200 mobil radar elektron müharibə sistemi və PUHU 3-LT mobil V/UHF elektron müharibə və elektron müdafiə sistemləri daxil olmaqla, yüksək səviyyəli qabaqcıl həllər təqdim edir. Bu məhsullar yüksək mübahisəli mühitlərdə elektromaqnit spektrinə nəzarət imkanlarını ön plana çıxarır. Nümayiş etdirilən sistemlər aşkarlama, identifikasiya, elektron hücum və müdafiə sahələrində ASELSAN-ın texnoloji yetkinliyini ortaya qoyur və müasir döyüş meydanında mühüm rol oynayır.
Sərgidə, həmçinin ASELSAN-ın pilotsuz uçuş aparatları üçün geniş faydalı yük portfeli yer alır. Buraya ASELFLIR ailəsi, qabaqcıl elektro-optik sistemlər, eləcə də LGK və TOLUN kimi dəqiq tuşlama dəstləri daxildir. Bu həllər yüksək dəqiqlikli hədəfləmə ilə yanaşı kəşfiyyat, müşahidə və izləmə (ISR) tapşırıqlarını dəstəkləyərək, ASELSAN-ın pilotsuz və şəbəkə-mərkəzli əməliyyatların əsas təminatçılarından biri olduğunu göstərir.
Dəniz sahəsində isə ASELSAN WDS-2026-da suüstü və sualtı döyüş üçün qabaqcıl həllərini təqdim edir. Bunlara DÜFAS sonar sistemi, HIZIR əks-tədbir sistemi, ZOKA 100-S/ED akustik maneə yaradan sistem və “aselBUOY” istiqamətləndirilən sonar sistemi daxildir. Bu sistemlər ASELSAN-ın müxtəlif dəniz əməliyyatları üzrə situasiya məlumatlılığını, sağqalma qabiliyyətini və sualtı qayıqlara qarşı mübarizə imkanlarını artıran inteqrasiya olunmuş dəniz döyüş həlləri təqdim etmək bacarığını nümayiş etdirir.
ASELSAN-ın WDS-də geniş məhsul çeşidi ilə iştirakını şərh edən şirkətin prezidenti və baş direktoru Ahmet Akyol bildirib ki, bu sərgi ASELSAN-ın ayrı-ayrı sistemlərdən deyil, birbaşa döyüşə hazır, inteqrasiya olunmuş müdafiə arxitekturaları təqdim etmək qabiliyyətini nümayiş etdirmək üçün mühüm platformadır.
“Yaxın Şərq bizim üçün ən strateji regionlardan biridir və WDS tərəfdaşlarımızla əlaqələri dərinləşdirmək, eləcə də uzunmüddətli əməkdaşlığı inkişaf etdirmək üçün mühüm forum rolunu oynayır. Bizim əsas məqsədimiz dayanıqlı və qarşılıqlı işlək həllər vasitəsilə çoxsahəli üstünlüyü təmin etməklə yanaşı, tərəfdaşlarımızın əməliyyat və texnoloji müstəqilliyini dəstəkləməkdir”, – deyə A. Akyol vurğulayıb.
