SpaceX Mars planlarını müvəqqəti kənara qoyaraq diqqətini Ayda özünü təmin edən yaşayış məntəqəsinin qurulmasına yönəldib...
Poliqon xəbər verir ki, SpaceX şirkətinin qurucusu İlon Mask Yer peykinin səthində özünü təmin edən şəhərin tikintisinin qarşıdakı on il ərzində mümkün ola biləcəyini açıqlayıb. Onun sözlərinə görə, şirkət strateji prioritetlərini yenidən nəzərdən keçirərək Marsdan çox Ay layihəsinə fokuslanıb, çünki texniki və logistik baxımdan bu hədəfə daha qısa müddətdə çatmaq mümkündür.
İlon Mask bildirib ki, SpaceX-in hazırkı əsas məqsədi Ayda özünü inkişaf etdirən və uzunmüddətli perspektivdə müstəqil fəaliyyət göstərə bilən şəhər salmaqdır. O, sosial şəbəkə X-də yazıb ki, Ay layihəsinin həyata keçirilməsi 10 ildən az vaxt apara bilər, halbuki oxşar miqyaslı şəhərin Marsda qurulması üçün ən azı 20 ildən çox müddət tələb olunur.
Maskın sözlərinə görə, Ay Yerə daha yaxın olduğu üçün ora uçuşlar həm texniki baxımdan daha sadə, həm də zaman etibarilə daha sərfəlidir. Belə ki, Aya uçuş üçün start pəncərəsi təxminən hər 10 gündən bir açılır və uçuşun özü cəmi iki gün çəkir. Marsa uçuş imkanları isə yalnız 26 ayda bir yaranır və səyahət təxminən altı ay davam edir. Bu amillər Ay layihəsini daha real və sürətli edir.
Bununla yanaşı, İlon Mask qeyd edib ki, Mars planları tamamilə gündəmdən çıxarılmayıb. Onun sözlərinə görə, SpaceX 5–7 il sonra Marsda da şəhərsalma işlərinə başlamağı planlaşdırır, lakin hazırkı mərhələdə əsas resurslar Ay proqramına yönəldiləcək.
The Wall Street Journal qəzetinin mənbələrə istinadən yaydığı məlumata görə, SpaceX 2027-ci ilin mart ayında Starship kosmik gəmisinin Aya ilk pilotsuz enişini həyata keçirməyi planlaşdırır. Nəşr yazır ki, şirkət NASA ilə əməkdaşlıq çərçivəsində müvəqqəti olaraq Ay proqramına üstünlük verir və Marsa yönəlik missiyaları sonrakı mərhələyə saxlayıb.
Poliqon.info
