Kubada uzun müddətdir davam edən yanacaq böhranı səbəbindən bəzi otellərin fəaliyyəti dayandırılıb, bu obyektlərdə qalan turistlər isə digər otellərə köçürülüb.
Milli mətbuatda yer alan xəbərlərə görə, Kuba rəhbərliyi yanacaq çatışmazlığını əsas gətirərək bəzi otelləri bağlayıb və turistləri başqa müəssisələrə yönləndirib. Kuba Baş nazirinin müavini Oskar Peres-Oliviya dövlət televiziyasına verdiyi açıqlamada enerji istehlakını azaltmaq, turizm obyektlərindən daha səmərəli istifadə etmək və cari turizm mövsümündən maksimum yararlanmaq məqsədilə xüsusi plan hazırlandığını bildirib.
Peres-Oliviya özəl şirkətlərin öz yanacaqlarını idxal edə bilməsi üçün prosedurların sadələşdiriləcəyini, bəzi bankların iş saatlarının yenidən qurulacağını və Havana Beynəlxalq Kitab Sərgisi kimi mədəni tədbirlərin növbəti elana qədər təxirə salındığını qeyd edib. Nəqliyyat naziri Eduardo Rodriqez isə daxili və xarici reyslərin davam edəcəyini, hava limanları və limanların fəaliyyətini sürdürəcəyini vurğulayıb.
Hökumətin tətbiq etdiyi fövqəladə tədbirlər
Kuba hökumətinin yanacaq böhranı ilə bağlı qəbul etdiyi təcili tədbirlərə aşağıdakılar daxildir:
* Məsafədən iş sisteminin tətbiqi;Bəzi ofislərin bağlanması;Dövlət xidmətlərinin məhdudlaşdırılması;Universitetlərdə dərs saatlarının yenidən tənzimlənməsi.
Dövlət mediasının məlumatına görə, xarici valyuta ilə satış edən yanacaqdoldurma məntəqələri fəaliyyətini davam etdirəcək, lakin satışlar hər şəxs və nəqliyyat vasitəsi üçün maksimum 20 litr ilə məhdudlaşdırılacaq.
ABŞ-ın Kubaya neft əngəli
ABŞ Prezidenti Donald Tramp yanvarın 30-da Kubaya neft satan və ya tədarük edən ölkələrdən gələn bütün mallara gömrük rüsumu tətbiq edilməsini nəzərdə tutan prezident sərəncamını imzalayıb. Ağ Ev bu qərarın Kubanın "zərərli fəaliyyət və siyasətlərinə" qarşı ABŞ-ın milli təhlükəsizlik və xarici siyasət maraqlarını qorumaq məqsədi daşıdığını müdafiə edib.
Tramp fevralın 1-də Kuba liderləri ilə neft tədarükünün tənzimlənməsi mövzusunda danışıqların başladığını elan etsə də, Kuba tərəfi bu məlumatı təkzib edib.
