Yunanıstan ordusu son illərin ən böyük casusluq qalmaqalı ilə sarsılıb. Yüksək rütbəli bir polkovnikin həm Yunanıstan ordusuna, həm də NATO-ya məxsus kritik məlumatları Çinə ötürdüyü məlum olub. Sözügedən zabit artıq hüquq-mühafizə orqanları tərəfindən saxlanılıb.
Məlumata görə, sızdırılan məlumatlar hərbi əməliyyatlar, rabitə sistemləri, radarlar, tezliklər və yeni müdafiə texnologiyalarını əhatə edir. İddialara əsasən, polkovnik Çin kəşfiyyatı tərəfindən təmin edilən xüsusi elektron cihaz vasitəsilə məxfi sənədlərin fotoşəkillərini çəkərək qarşı tərəfə ötürüb.
Hərbi Hava Qüvvələrində xidmət edən polkovnikin artıq cinayətini etiraf etdiyi bildirilir. Yunanıstan mətbuatına danışan mənbələr bu hadisənin ölkənin müdafiə qabiliyyəti və NATO-nun kollektiv təhlükəsizliyi baxımından ciddi potensial təhdid yaratdığını vurğulayıblar.
Yunanıstan rəsmiləri daha dərin araşdırmalara başlayıblar. Məlum olub ki, sözügedən zabit yalnız məlumat ötürməklə kifayətlənməyib, həm də digər hərbi qulluqçuları bu kəşfiyyat şəbəkəsinə daxil etməyə çalışıb. Hazırda şəbəkənin digər mümkün üzvlərinin müəyyən edilməsi istiqamətində əməliyyatlar davam edir.
