Müəllif:Mehin Qasımova,Banco.az
Qlobal bazarlarda geniş yayılmış riskdən yayınma meyli fonunda Bitkoin qısa müddətə 72 min dollar səviyyəsindən aşağı düşərək təxminən son 15 ayın ən aşağı həddinə enib.
Banco.az xəbər verir ki, dünyanın ən böyük kriptovalyutası ötən ilin oktyabrında qeydə alınan zirvə səviyyəsindən bəri dəyərinin 42%-dən çoxunu itirib və eniş trendini davam etdirir. Bitkoin cümə axşamı Asiya ticarət sessiyasında 71 540 dollara qədər ucuzlaşıb. Bu göstərici Donald Trampın yenidən ABŞ prezidenti seçilməsindən sonrakı gün – 6 noyabr 2024-cü ildən bəri ən aşağı səviyyə kimi qeydə alınıb. Kriptovalyuta çərşənbə günü Nyu-York ticarətində də 71 739 dollaradək geriləmişdi.
ABŞ-da ticarət edilən Bitkoin birja ticarət fondlarına (ETF) vəsait axınları da dəyişkənlik nümayiş etdirib. Bloomberg-in məlumatına görə, bazar ertəsi günü bu fondlara təxminən 562 milyon dollar xalis daxilolma qeydə alınıb. Lakin çərşənbə axşamı investorlar ETF-lərdən 272 milyon dollar vəsait çıxarıblar.
Artan bazar gərginliyi fonunda Bitkoinin “təhlükəsiz sığınacaq” statusu ilə bağlı suallar yenidən gündəmə gəlib. Bitkoin bu il indiyədək təxminən 17% ucuzlaşıb, qlobal kriptovalyuta bazarının ümumi dəyəri isə təkcə son bir həftə ərzində 460 milyard dollardan çox azalıb.
