BAKI, 4 fevral. TELEQRAF
Çin qəza təhlükəsizliyi ilə bağlı narahatlıqlar fonunda elektromobillərdə gizli qapı tutacaqlarının istifadəsini qadağan etməyə hazırlaşır.
Teleqraf xəbər verir ki, Sənaye və İnformasiya Texnologiyaları Nazirliyinin bazar ertəsi elan etdiyi qaydalara əsasən, Çində satılan avtomobillərin yük bölməsi istisna olmaqla hər bir qapısında həm içəridən, həm də çöldən mexaniki açma mexanizmi olmalıdır.
Nazirlik bildirib ki, yeni tələblər avtomobillərin təhlükəsizlik dizaynının səviyyəsini artıracaq. Qaydalar gələn ilin 1 yanvarından qüvvəyə minəcək. Sənədə görə, hər avtomobildə qapının əl ilə açılması üçün ən azı 6 x 2 x 2,5 santimetr ölçüdə əl ilə istifadə oluna bilən sahə təmin edilməli, həmçinin salon daxilində sərnişinlərə qapının necə açılacağını göstərən nişanlar yerləşdirilməlidir.
Gizli, səthə birləşdirilmiş və elektrik siqnalı ilə açılan qapı tutacaqları ilk dəfə 2012-ci ildə təqdim olunan “Tesla Model S” modeli ilə geniş yayılıb. Bu dizayn aerodinamik müqaviməti azaldaraq avtomobilin səmərəliliyini bir qədər artırsa da, elektrik enerjisi kəsildiyi hallarda qapıların açılmasının mümkün olmaması səbəbindən tənqid olunur.
Bu tip tutacaqlar hazırda Çində də geniş istifadə edilir. Dövlət mediasının məlumatına görə, ən çox satılan 100 yeni enerji avtomobilinin, yəni elektromobil və hibrid modellərin təxminən 60 faizində bu dizayn tətbiq olunur. Yeni qaydalara əsasən, gələn ildən sonra buraxılacaq avtomobillər bu tələblərə uyğun olmalı, bu isə bir çox Çin istehsalçısını modellərini yenidən dizayn etməyə məcbur edəcək. Artıq təsdiqlənmiş və satışa çıxmağa hazır olan bəzi modellərə isə dizaynı yeniləmək üçün iki illik möhlət verilib.
Qərarın qəbuluna səbəb kimi bir neçə səs-küylü və ölümlə nəticələnən qəza göstərilir. Bu hadisələrdə elektrik enerjisinin kəsilməsi səbəbindən avtomobildə qalan şəxslərin qapıları aça bilmədiyi bildirilir. Məsələn, oktyabr ayında Çinin Çendu şəhərində “Xiaomi” şirkətinə məxsus SU7 elektrik sedanının iştirakı ilə baş verən qəza zamanı şahidlər sürücünü xilas etmək üçün avtomobili aça bilməyiblər və maşın alovlanıb.
ABŞ-də isə 2024-cü ildə baş vermiş qəza ilə bağlı “Tesla” şirkətinə qarşı məhkəmə iddiası qaldırılıb. Polis hesabatına görə, “Cybertruck” ağaca çırpıldıqdan sonra alovlanıb, yanğın elektrik qapıların enerjisini kəsib və sərnişinlər avtomobildən çıxa bilməyiblər. Nəticədə dörd nəfərdən üçü həlak olub.
Qeyd edək ki, Çin dünyanın ən böyük elektromobil bazarıdır və ölkənin onlarla brendi artıq xarici bazarlarda da fəaliyyətini genişləndirir. Son statistikaya görə, Çin şirkəti BYD ötən il elektromobil satışında ilk dəfə olaraq “Tesla”nı geridə qoyub.
