Ajans.az xəbər verir ki, bu barədə Tramp Truth Social hesabında yazıb:
“Hazırda 1 milyard dollar təzminat tələb edirik və Harvard Universiteti ilə gələcəkdə heç bir münasibət istəmirik.” ABŞ lideri universiteti “dərin antisemitizm”də ittiham edib və əlavə edib ki, orada “qanunun kobud şəkildə pozulmasına” yol verilib. Keçən il Vaşinqton administrasiyası yəhudi tələbələrin antisemitizmdən qorunması zərurətini əsas gətirərək Harvardın siyasətində dəyişikliklər tələb etmişdi. Eyni zamanda universitetə qarşı bir sıra digər tədbirlər də görülüb. Tramp xüsusilə universitetin siyasi təşkilat kimi təsnif edilməsini və vergidən azad statusunun ləğvini təklif edib. ABŞ Təhsil Nazirliyi isə universitetə 2,2 milyard dollarlıq qrantları və 60 milyon dollarlıq uzunmüddətli müqavilələri dondurub. 2025-ci ilin oktyabrında Tramp Harvard rəsmiləri ilə universitetin təxminən 500 milyon dollar ödəməsi və peşə məktəblərində süni intellektlə qarşılıqlı əlaqə proqramları üçün insan resurslarının hazırlanması barədə razılığa gəldiyini açıqlamışdı. Lakin bazar ertəsi günü yayımlanan açıqlamada Tramp universitetin bu addımlarını qeyri-kafi hesab etdiyini bildirib. O, həmçinin The New York Times qəzetində ABŞ administrasiyasının artıq universitetdən 200 milyon dollar tələb etmədiyi barədə yayılan xəbəri təkzib edib.