Linvey Din 2 mindən çox səhifəlik Google sirrini oğurlayıb Çinə ötürməkdə təqsirli bilinib...
Poliqon xəbər verir ki, ABŞ-ın Kaliforniya ştatında keçmiş Google mühəndisi Linvey Din (Leon Din kimi də tanınır) iqtisadi casusluq və kommersiya sirrinin oğurlanması ittihamı ilə təqsirli bilinib. 38 yaşlı Çin vətəndaşı olan Din 2022-ci ilin mayından 2023-cü ilin aprel ayına qədər Google-un süni intellekt (AI) sahəsindəki inkişafları ilə bağlı 2000-dən çox səhifəlik məxfi sənədi kopyalayıb və şəxsi bulud saxlama xidmətinə yükləyib.
Məhkəmə sənədlərinə və ABŞ Ədliyyə Nazirliyinin açıqlamasına əsasən, Din 2023-cü ilin əvvəllərində Çində fəaliyyət göstərən bir süni intellekt startapında texniki direktor vəzifəsi üçün danışıqlar aparıb. Eyni zamanda o, Çin ərazisində maşın öyrənməsi texnologiyalarına yönəlmiş öz şirkətini də qurub. Potensial investorlara verdiyi çoxsaylı açıqlamalarda Din iddia edib ki, Google-un texnologiyasını kopyalayıb dəyişdirərək superintellekt superkompüteri yarada bilər.
Google-dan işdən çıxarılmasından bir neçə gün əvvəl o, oğurladığı bütün məlumatları şəxsi kompüterinə yükləyib. 2024-cü ilin mart ayında ona qarşı rəsmi ittiham irəli sürülüb. Dinə hər bir kommersiya sirrinin oğurlanması ittihamı üzrə 10 ilə qədər, hər bir iqtisadi casusluq ittihamı üzrə isə 15 ilə qədər həbs cəzası təhlükəsi ilə üzləşib.
Məhkəmə prosesində prokurorlar qeyd ediblər ki, Dinin hərəkətləri yalnız şirkətə deyil, ABŞ-ın milli təhlükəsizliyinə və texnoloji üstünlüyünə ciddi təhdid yaradıb. Google-un süni intellekt üzrə aparıcı layihələrinin bir hissəsi məhz bu məlumatlar əsasında inkişaf etdirilib.
Hadisə ABŞ və Çin arasındakı texnoloji rəqabətin və casusluq ittihamlarının yeni mərhələsini göstərir. Son illərdə Çindən olan bir neçə mühəndis və alim oxşar ittihamlarla üzləşib, bu da Vaşinqtonun Çinin yüksək texnologiyalara çıxışını məhdudlaşdırma siyasətinin bir hissəsi kimi qiymətləndirilir.
Poliqon.info
