Kevin Hassettin açıqlamasına görə, yeni qlobal düzən uzunmüddətli perspektivdə hamı üçün faydalı olacaq...
Poliqon xəbər verir ki, ABŞ-nin Milli İqtisadi Şurasının direktoru Kevin Hassett beynəlxalq münasibətlər və qlobal iqtisadi sistemlə bağlı diqqətçəkən açıqlama verib. O bildirib ki, Vaşinqton mövcud qlobal qaydaları yenidən formalaşdırmaq istiqamətində addımlar atır və bu prosesin yekunda bütün tərəflər üçün müsbət nəticələr doğuracağını düşünür.
“Bz dünya nizamını yenidən qururuq və nəticədə bu, hamı üçün sərfəli olacaq”, deyə Hasset vurğulayıb.
ABŞ rəsmisi bu yanaşmanın həm iqtisadi əməkdaşlıq, həm də qlobal sabitlik baxımından yeni imkanlar yaradacağını vurğulayıb.
Ekspertlərin fikrincə, bu tip açıqlamalar ABŞ-nin beynəlxalq ticarət, investisiya axınları, enerji bazarları və geosiyasi risklərin idarə olunması ilə bağlı daha geniş strategiyasının bir hissəsi kimi qiymətləndirilir. Bildirilir ki, “dünya nizamının yenidən qurulması” ifadəsi bir sıra istiqamətləri əhatə edə bilər: qlobal təchizat zəncirlərinin yenidən təşkili, istehsal və texnologiya sahələrində strateji tərəfdaşlıqların gücləndirilməsi, maliyyə və təhlükəsizlik arxitekturasında yeni mexanizmlərin tətbiqi.
Qeyd olunur ki, belə bir dönüş siyasəti həm ABŞ-nin iqtisadi maraqlarını qorumağa, həm də qlobal iqtisadiyyatda dəyişən güc balansına uyğun yeni yanaşma formalaşdırmağa hesablanıb. Bununla yanaşı, prosesin ayrı-ayrı ölkələr və bazarlar üçün fərqli təsirləri ola biləcəyi də istisna edilmir.
Poliqon.info
