Qəhvə ləkələri evdə ən çox rast gəlinən və çıxarılması çətin olan ləkələr arasında yer alır.
Pravda.az bildirir ki, düzgün və vaxtında müdaxilə edildikdə qəhvə ləkələrindən asanlıqla xilas olmaq mümkündür.
Mütəxəssislərin sözlərinə görə, qəhvə ləkəsi yaranan kimi ilk olaraq parça soyuq su ilə yaxalanmalıdır. İsti suyun istifadəsi ləkənin parça liflərinə daha dərindən hopmasına səbəb ola bilər. İlkin mərhələdə sabunlu su ilə yumşaq şəkildə təmizləmə də effektiv üsullar arasındadır.
Quru və köhnə qəhvə ləkələri üçün limon suyu və ya sirkə məhlulundan istifadə tövsiyə olunur. Qabartma tozu isə ləkəni udmaqla yanaşı, qəhvə qoxusunun aradan qaldırılmasına kömək edir. Təmizləmə zamanı parçanı sərt şəkildə ovmaq əvəzinə, yüngül tampon hərəkətləri etmək məsləhət görülür.
Əgər qəhvə süd və ya qaymaqla birlikdə tökülübsə, mütəxəssislər əvvəlcə yağlı təbəqənin qab yuma geli ilə təmizlənməsini tövsiyə edirlər. Çünki yağlı maddələr ləkənin çıxarılmasını çətinləşdirə bilər.
Parça növünə uyğun üsul seçimi də vacibdir. Ağ parçalar üçün hidrogen peroksid, rəngli parçalar üçün isə sirkəli məhlul daha təhlükəsiz hesab olunur. Köhnə ləkələrdə buxar təmizləyicilərindən istifadə də effektiv nəticə verə bilər.
Əminə Bayramova
