Gəncə Apellyasiya Məhkəməsində rüşvət almaqda, dələduzluqda və digər cinayətlərdə təqsirləndirilən Elçin Abbasovun barəsindəki hökmdən dövlət ittihamçısı tərəfindən verilən apellyasiya protesti və apellyasiya şikayəti üzrə məhkəmə prosesi başa çatıb.
Azia.az bildirir ki, Pravda.az-ın əldə etdiyi məlumata görə, hakim Müşfiq Məmmədovun sədrliyi ilə keçirilən prosesdə qərar elan edilib.
Qərara əsasən, apellyasiya şikayəti təmin edilməyib, apellyasiya protesti isə təmin olunub, Gəncə Ağır Cinayətlər Məhkəməsinin hökmü dövlət ittihamçısının apellyasiya protestinə münasibətdə dəyişdirilib. Belə ki, birinci instansiya məhkəməsinin hökmündən Cinayət Məcəlləsinin 70-ci (şərti) maddəsinin tətbiqinə dair müddəalar xaric edilib. Qərarına görə, Elçin Abbasov Cinayət Məcəlləsinin 311.3.2-ci maddəsi ilə təqsirli bilinərək, həmin Məcəllənin 62-ci maddəsi tətbiq edilməklə və CM-nin 46.2-ci maddəsinə əsasən ona 2 il müddətinə dövlət və yerli özünüidarə orqanlarında müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə 4 il müddətinə azadlıqdan məhrumetmə cəzası təyin edilib.
Bununla yanaşı, Cinayət Məcəlləsinin 66.3 və 66.4-cü maddələrinə əsasən, hazırkı qərarla CM-in 311.3.2-ci maddəsi üzrə təyin edilmiş əsas və əlavə cəza, eləcə də Gəncə Ağır Cinayətlər Məhkəməsinin hökmü ilə təqsirli bilindiyi CM-in 178.2.2, 178.2.3, 308.2 və 312-1.1-ci maddələri üzrə təyin olunmuş əsas və əlavə cəzalarla qismən toplanılıb, əlavə cəza əsas cəzaya birləşdirilib. Nəticədə təqsirləndirilən şəxs qəti olaraq 3 il müddətinə dövlət və yerli özünüidarə orqanlarında müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə 4 il 6 ay müddətinə azadlıqdan məhrumetmə cəzasına məhkum edilib.
Məhkəmə qərarında həmçinin Cinayət Məcəlləsinin 69.3-cü maddəsinə əsasən, Elçin Abbasovun 2022-2025-ci illərdəki hazırkı iş üzrə həbsdə saxlanıldığı 2 il 11 ay 21 gün müddətin ona təyin olunmuş cəzadan çıxılması göstərilib. Bu nəzərə alınmaqla, təqsirləndirilən şəxs üzərində qəti olaraq 3 il müddətinə dövlət və yerli özünüidarə orqanlarında müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə 1 il 6 ay 9 gün müddətinə azadlıqdan məhrumetmə cəzası saxlanılıb.
Qərara əsasən, hökmlə əlavə cəza kimi təyin edilmiş 3 il müddətinə dövlət və yerli özünüidarə orqanlarında müəyyən vəzifə tutma və ya müəyyən fəaliyyətlə məşğul olma hüququndan məhrumetmə cəzası, əsas cəzanın çəkildiyi bütün müddətə, eləcə də bu cəza növü üçün müəyyən edilmiş əlavə müddətə şamil edilib.
Apellyasiya instansiyası məhkəməsi tərəfindən təqsirləndirilən şəxs barəsində seçilmiş başqa yerə getməmək haqqında iltizam qətimkan tədbiri ləğv edilərək həbs qətimkan tədbiri ilə əvəz olunub və o, məhkəmə iclas zalından dərhal həbs edilib.
Qərarla Elçin Abbasov cəzasını ümumi rejimli cəzaçəkmə müəssisəsində çəkməsi müəyyən edilib.
Qeyd: Elçin Abbasov Şəmkir Rayon İcra Hakimiyyəti Başçısının Çinarlı qəsəbə inzibati ərazi dairəsi üzrə keçmiş nümayəndəsi və "Acı arx” Sudan İstifadəedənlər Birliyinin İdarə Heyətinin sədri vəzifəsində çalışıb.
İttiham aktına görə, Elçın Abbasov 2021-2022-ci illər ərzində vəzifəli şəxs kimi xidməti vəzifələrinin icrası ilə əlaqədar həmin qəsəbə ərazisində yaşayan ayrı-ayrı şəxslərdən istifadələrində olan əkin sahələrinin suvarılmasının təşkil edilməsi üçün kütləvi şəkildə hər hektar torpaq sahəsinə görə 500 manat olmaqla müxtəlif məbləğlərdə pul vəsaitini rüşvət qismində almasında, eləcə də torpaq istifadəçilərinə suvarma üçün suyun verilməsini qismən həyata keçirib təsərrüfatlarına qəsdən ziyan vurub.
Cinayət işi üzrə 21 nəfər zərərçəkmiş qismində tanınıb.
Gəncə Ağır Cinayətlər Məhkəməsinin hökmü ilə Elçin Abbasova şərti cəza verilmişdi.
Kamal Məmmədov
