Abşeron Rayon Məhkəməsində qəsdən sağlamlığa yüngül zərər vurmada təqsirləndirilən Valeh Nəcəfovun (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Firuzə Kərimovanın sədrliyi ilə keçirilən prosesdə hökm oxunub.
Məhkəmənin hökmü ilə “Konstitusiya və Suverenlik İli” münasibətilə amnistiya elan edilməsi haqqında Milli Məclisin 19 dekabr 2025-ci il tarixli Qərarının 5.1-ci bəndi tətbiq edilməklə təqsirləndirilən şəxs Cinayət Məcəlləsinin 128-ci maddəsi ilə cinayət məsuliyyətindən azad edilib və iş üzrə icraata xitam verilib. Valeh Nəcəfov barəsində seçilmiş polisin nəzarəti altına vermə qətimkan tədbiri ləğv olunub.
İttiham aktına əsasən, Valeh Nəcəfov 24 fevral 2025-ci il tarixdə saat 19:00 radələrində sərnişini olduğu “Toyota Prius” markalı avtomobilin sürücüsü zərərçəkmiş Məğrur İslamzadə (adı, soyadı şərtidir) ilə Abşeron rayonu, Xırdalan şəhəri, AAAF Park yaşayış massivində yerləşən məscidin yaxınlığında gedişhaqqı ilə bağlı yaranmış mübahisə zamanı ona xəsarətlər yetirib.
Belə ki, baş vermiş mübahisə zamanı təqsirləndirilən şəxs qəsdən zərərçəkmiş şəxsin sifətinə iki dəfə yumruq zərbəsi endirib. Nəticədə o, Məğrura üzün sol gözaltı və yanaq nahiyələrinin, göz qapaqlarının şişkinlikli qançırı, gözün ağlı qişasına qansızma, sol gözün üst qapağının əzilmiş yarası kimi sağlamlığın qısa müddətə pozulmasına səbəb olan yüngül bədən xəsarətləri yetirib.
Məhkəmə iclasında Valeh Nəcəfov Cinayət Məcəlləsinin 128-ci maddəsində nəzərdə tutulmuş əməli törətməkdə özünü təqsirli bilib və ifadəsində deyib ki, Abşeron rayonu, Xırdalan şəhəri, AAAF Park yaşayış kompleksində S.S. (adı, soyadı şərtidir) adlı qadınla qeyri-rəsmi birlikdə kirayə yaşayır, özü isə Vətən müharibəsi iştirakçısıdır.
Onun sözlərinə görə, hadisə günü S.S.-in qızları ilə birlikdə AAAF Park yaşayış kompleksində yerləşən məscidin yaxınlığına getmək üçün mobil telefon vasitəsilə “Bolt” tətbiqi üzərindən taksi sifariş ediblər. Təqsirləndirilən şəxsin ifadəsinə əsasən, sürücü onları əvvəlcə AAAF Park ərazisində yerləşən “Bazarstore” yaxınlığına aparacağını desə də, sərnişinlər məscidin yanına getməli olduqlarını bildiriblər. Ünvanına çatdıqdan sonra S.S.-in qızı sürücünün kart hesabına 3 manat ödəniş edib və avtomobildən düşüblər. Lakin sürücü əlavə pul tələb edib, bu səbəbdən tərəflər arasında sözlü mübahisə yaranıb.
“Sürücü S.S.-in qızının ünvanına xoşagəlməz ifadələr işlətdi, daha sonra avtomobildən düşərək mənə yumruq atdı. Buna cavab olaraq mən də Məğrurun sifət nahiyəsindən bir dəfə yumruq vurdum. Nəticədə sürücünün qaş nahiyəsindən qan gəldi. Hadisə zamanı ətrafda olan naməlum şəxs Məğrurla mübahisəmizi dayandıraraq ərazidən uzaqlaşmağı tövsiyə etdi. Bundan sonra sürücü hadisə yerindən getdi”, - təqsirləndirilən şəxs əlavə edib.
Kamal Məmmədov
