Görüş İraq Kürdüstanının paytaxtında, beynəlxalq vasitəçilərin iştirakı ilə baş tutacaq...
Suriya hökuməti ilə “Suriya Demokratik Qüvvələri” (SDF) arasında növbəti danışıqlar raundu İraq Kürdüstanının paytaxtı Ərbildə keçiriləcək.
Poliqon xəbər verir ki, bu barədə Al Arabiya telekanalı kürd mənbələrinə istinadən məlumat yayıb.
Məlumata görə, görüş İraq Kürdüstanı Muxtariyyətinin sabiq prezidenti Məsud Bərzaninin vasitəçiliyi ilə baş tutacaq. Danışıqlarda Suriya tərəfini ölkənin xarici işlər naziri Əl-Şibani, SDF-ni isə alyansın komandanı Mazlum Abdi və onun qadın bölməsinin komandiri Afrin təmsil edəcək. Qarşıdakı görüşün dəqiq tarixi hələlik açıqlanmayıb.
Mənbələrin bildirdiyinə görə, danışıqlarda ABŞ-nin Suriya üzrə xüsusi nümayəndəsi Barrak da iştirak edəcək. Qeyd olunur ki, müzakirələr Suriya prezidenti Əş-Şaraanın 18 yanvar tarixində imzaladığı razılaşma çərçivəsində aparılacaq.
Analitiklərin fikrincə, Ərbildə planlaşdırılan bu görüş Suriya daxilində siyasi dialoqun bərpası və ölkənin şimal-şərqində mərkəzi hakimiyyətlə kürd qüvvələri arasında münasibətlərin tənzimlənməsi baxımından mühüm əhəmiyyət daşıyır. Danışıqların nəticələrinin regionda təhlükəsizlik vəziyyətinə və beynəlxalq aktorların mövqelərinə təsir göstərə biləcəyi istisna edilmir.
Poliqon.info
