ain.az xəbər verir, Bizimyol saytına əsaslanaraq.
ABŞ Prezidenti Donald Tramp hesab edir ki, Nobel Sülh Mükafatını almadığı üçün artıq yalnız sülh haqqında düşünmək məcburiyyətində deyil və ABŞ-ın maraqlarını önəmsəyə bilər.
Bizimyol.info xəbər verir ki, bu barədə Tramp Norveçin Baş Naziri Jonas Gahr Störeyə yazdığı məktubda bildirib. Məktubu ABŞ telekanalı PBS-in jurnalisti Nik Şifrin X sosial şəbəkəsində yayımlayıb.
“Ölkəniz mənə səkkizdən çox müharibəni dayandırdığıma görə Nobel Sülh Mükafatını verməməyi seçdiyindən, mən artıq yalnız sülh haqqında düşünmək məcburiyyətində deyiləm. Bununla belə, sülhün həmişə birinci yerdə olacağını düşünürəm və indi daha çox ABŞ üçün doğru və yaxşı olanlar barəsində düşünə bilərəm”, — deyə Tramp məktubunda qeyd edib.
Prezident həmçinin Danimarkanın Qrenlandiyaya sahiblik hüququna şübhə ilə yanaşıb, çünki, Trampın fikrincə, Danimarka adanı Rusiya və Çindən qorumaqda aciz olub. O, həmçinin bildirib ki, NATO üçün qurumun yaradılmasından bəri “hər kəsdən daha çox iş görüb” və buna əsaslanaraq alyansdan “ABŞ üçün bir şeylər etməsini” tələb edib. “Əgər Qrenlandiya üzərində tam və hərtərəfli nəzarətimiz olmasa, sülh təhlükəsiz olmayacaq”, — deyə Tramp əlavə edib.
Şifrin bildirib ki, Trampın məktubu Ağ Ev Milli Təhlükəsizlik Şurası tərəfindən Vaşinqtondakı Avropa səfirlərinə paylanıb və jurnalist özü mətni bir neçə rəsmidən əldə edib.
Tramp əvvəllər də bir neçə dəfə Qrenlandiyanın ABŞ-a qoşulmasının vacibliyini qeyd edib. Hətta əvvəlki prezidentlik dövrünün ilk illərində adanı satın almağı təklif etmiş, 2025-ci ilin mart ayında isə onu ilhaq etməyin mümkünlüyünə əmin olduğunu bildirmişdi. Ağ Evin Aparatının müavini Stiven Miller də əvvəlcə Danimarkanın adaya nəzarət hüququnu şübhə altına almışdı.
Qrenlandiya Danimarkanın muxtar bölgəsi hesab olunur. 1951-ci ildə Vaşinqton və Kopenhagen NATO çərçivəsindəki müttəfiqlik öhdəliklərinə əlavə olaraq müdafiə müqaviləsi imzalayıb. Müqaviləyə əsasən ABŞ ada üzərində mümkün hərbi təcavüzdən qoruma öhdəliyini üzərinə götürüb.
Qadir, Bizimyol.info
Hadisənin gedişatını izləmək üçün ain.az saytında ən son yeniliklərə baxın.
