Hadisə Fransada hüquq-mühafizə orqanlarına ictimai etimadı sarsıdıb...
Fransanın Anqulem şəhərində polis bölməsində çalışan əməkdaş 17 yaşlı qızı bıçaq hədəsi ilə qaçırmaq və zorlamada şübhəli bilinərək həbs edilib.
Poliqon xəbər verir ki, bu barədə Le Figaro nəşri məlumat yayıb.
Məlumata görə, yeniyetmə qız Nersak kommunasında avtobus dayanacağına gedərkən kapüşonlu və əlində bıçaq olan naməlum şəxs tərəfindən zorla avtomobilə mindirilib. Şübhəli onu meşəlik əraziyə apararaq zorlayıb. Qız uyğun məqamdan istifadə edərək qaçmağa müvəffəq olub və dərhal hüquq-mühafizə orqanlarına müraciət edib.
İstintaq çərçivəsində 45 yaşlı polis əməkdaşı yanvarın 13-də saxlanılıb. Yerli media yazır ki, son həftələrdə Nersak ərazisində oxşar şəraitdə daha iki qadına hücum qeydə alınıb və bu faktlar da araşdırmaya cəlb olunub. Müstəntiqlər saxlanılan şəxsin həmin hücumlarla mümkün əlaqəsini də yoxlayır.
Bundan əvvəl Fransada başqa bir qalmaqallı hadisə də baş verib. Gənc qız qonşusunun onu zorlamağa cəhd etdiyini bildirərək müqavimət göstərib. Hücum zamanı o, baltadan istifadə edərək kişiyə ağır zərbə endirib, daha sonra isə çubuqla vurub. Hadisə nəticəsində kişi həyatını itirib. Qız hadisədən sonra özü polis bölməsinə gedərək baş verənlər barədə ifadə verib və saxlanılıb. Ölən şəxsin həyat yoldaşı isə qızın guya kişini bilərəkdən evinə çağırdığını iddia edib.
Fransada baş verən bu hadisələr geniş ictimai rezonans doğurub və hüquq-mühafizə orqanlarında nəzarət, daxili yoxlamalar və vətəndaş təhlükəsizliyi məsələləri ətrafında müzakirələri daha da gücləndirib.
Poliqon.info
