BAKI, 9 dekabr. TELEQRAF
Dünyada ilk dəfə BE-CAR7 adlı gen terapiyası tətbiq olunub.
Teleqraf xəbər verir ki, nəticələr "New England Journal of Medicine" jurnalında dərc olunub.
Bildirilir ki, Böyük Britaniyada aparılan klinik sınaq nəticəsində daha əvvəl müalicəsi mümkün olmayan nadir qan xərçəngi növündən əziyyət çəkən xəstələrin əksəriyyəti sağalıb.
2022-ci ildə aqressiv T-hüceyrəli kəskin limfoblast leykemiyası diaqnozu qoyulan 16 yaşlı Alissa Tepli təcrübəvi müalicəni alan ilk xəstə olub. Gen terapiyası nəticəsində o, tam sağalıb.
Londonun Böyük Ormond Strit Xəstəxanasında və Kinqs Kollec Xəstəxanasında 8 uşaq və 2 böyüklə aparılan sınağın nəticələri göstərib ki, xəstələrin üçdə ikisi 3 ilə yaxın müddətdə xəstəliyə qalib gəlib.
BE-CAR7 texnologiyası donor T-hüceyrələrində genetik kodun tək bir hərfini dəyişdirən yüksək dəqiqlikli üsuldur. Alimlər hüceyrələrdə üç “baza düzəlişi” edərək onları xəstənin bütün T-hüceyrələrini (həm sağlam, həm də xərçəngli) məhv edən “universal” müalicəyə çeviriblər. Xəstələrin T-hüceyrələri tam təmizləndikdən sonra sağlam immun sistemini bərpa etmək üçün sümük iliyi transplantasiyası həyata keçirilib.
Böyük Ormond Strit Xəstəxanasının xeyriyyə fondu daha 10 xəstənin bu müalicəni almasını maliyyələşdirməyə razılaşıb. Həkimlər ümid edirlər ki, standart müalicəyə cavab verməyən təxminən 20% T-hüceyrəli leykemiya xəstəsi üçün bu terapiya yeni çıxış yolu ola bilər.
