Rusiyanın Novorossiysk limanında yerləşən Xəzər Boru Kəməri Konsorsiumu (CPC) sisteminin dəniz terminalı Ukrayna dronları tərəfindən vurulub.
FED.az xəbər verir ki, son dövrlər Rusiyanın zəif yerini tapan Ukrayna tərəfi neft-qaz infrastrukturunu hədəf götürüb. Bu dəfə isə rusiyanın Qara Dənizdə yerləşən əsas terminalı olan Novorossiyskdəki terminal vurulub.
Terminal noyabrın 29-i səhər saatlarında pilotsuz katerlərin hücumu nəticəsində zədələnib.
Xəzər Boru Kəməri Konsorsiumu bu hadisəni və terminalın zədələndiyini təsdiqləyib: «Bu gün Moskva vaxtı ilə saat 04:06-da pilotsuz katerlərin hücumu nəticəsində terminalın ikinci yanalma qurğusu ciddi zədələnib. Yükləmə və digər əməliyyatlar dayandırılıb, tankerlər CPC akvatoriyasından kənara çıxarılıb».
Şirkət elan edib ki, hələlik terminalın fəaliyyəti dayandırılır, çünki buna həm texniki imkan yoxdur, həm də pilotsuz katerlərin və dronların hücumu mütəmadi olaraq təkrarlanır.
«Dağılmış yanalma qurğusunun bundan sonra istismarı mümkün deyil. Terminalda yükləmə əməliyyatları pilotsuz kater və PUA təhlükəsi aradan qaldırıldıqdan sonra bərpa olunacaq»- deyə məlumatda bildirilir.
