Gələn il Ermənistanda parlament seçkilərinin keçiriləcəyi gözlənilir. Artıq indidən mövcud iqtidara qarşı addımlar atılmağa başlanılıb. Eyni zamanda Nikol Paşinyan da öz rəqiblərini neytrallaşdırmağa çalışır. Buna görə də, sərt ritorikaya üstünlük verir.
Maraqlıdır, bu seçkilərdə Paşinyanın aqibəti necə olacaq? Qalib gələcək, yoxsa təxribatlarla üzləşəcək?
Mövzu ilə bağlı NOCOMMENT.az– politoliq Əhəd Məmmədli danışıb. O bildirib ki, gələn seçkilər Ermənistan üçün çox çətin olacaq:
“Ermənistanda Paşinyan hazırda favorit siyasətçi hesab edilir. Bir müddət əvvəl onun reytinqi aşağı düşmüşdü. Hətta bələdiyyə seçkilərində məğlub olmuşdu. Amma indi tam əksini müşahidə edirik.
İndi Ermənistanda həbslər baş verir. Paşinyan öz apponentləri ilə çox sərt davranır. Digər rəqiblərinə qarşı da açıq mövqe sərgiləyir və həbslərdən də çəkinmir.
Baxmayaraq ki, o, Ermənistanı demokratik ölkə sayır, hərçənd rəqiblərinə qarşı çox sərt davranır. Bu da ikili standartların göstəricisidir”.
“Fikrimcə, gələn il keçiriləcək seçkilərdə Paşinyan qalib olacaq. Amma tam qələbə qazanmaya bilər. Faiz əmsalı ilə götürsək, hətta iki-üç partiya ilə koalisiya qurması mümkündür. Amma ümumi gedişat Paşinyanın qalib gələcəyini göstərir. Seçkilərdən sonra müxalifətin aksiyalar keçirməsi mümkündür. Lakin bunun Paşinyan hakimiyyətinə ciddi təsiri olmayacaq və o, öz iqtidarını qoruyub saxlayacaq”, – ekspert yekunlaşdırıb.
