ain.az, Yeniazerbaycan portalına istinadən məlumatı açıqlayır.
Almaniyada hakimiyyət koalisiyası pensiya islahatı ilə bağlı yaranmış fikir ayrılığını aradan qaldırıb.
AZƏRTAC “Tagesschau” xəbər xidmətinə istinadla bildirir ki, Xristian Demokratlar İttifaqı (CDU), Xristian Sosialistlər İttifaqı (CSU) və Sosial Demokratlar Partiyası (SPD) rəhbərlərinin gecə yarısınadək davam edən danışıqlarından sonra razılıq əldə olunub və hökumət pensiya paketi üzrə mövcud qanun layihəsini dəyişmədən saxlayacaq. Lakin koalisiya gənclər təşkilatının – “Yunge Union”un narahatlıqlarını azaltmaq üçün sənədə əlavə izahat mətninin salınmasına razılaşıb. Gənclər qrupu xüsusilə 2031-ci ildən sonra pensiya səviyyəsinin yüksək saxlanmasının yaratdığı mümkün milyardlarla avroluq xərc yükünə etiraz edirdi.
Koalisiyanın təqdim etdiyi izahat mətnində gələn il əsaslı pensiya islahatına start veriləcəyi vurğulanır. Bu məqsədlə 2026-cı ilin ikinci rübünədək ilkin təkliflər hazırlayacaq xüsusi komissiya yaradılacaq. Hökumət pensiya səviyyəsinin uzunmüddətli sabitliyini təmin etmək üçün maliyyə dayanıqlılığını gücləndirən mexanizmlər üzərində işləməyi planlaşdırır. Bu çərçivədə “davamlılıq faktoru”nun yenilənməsi, həmçinin gələcək on il ərzində pensiya haqlarının sabit saxlanması nəzərdə tutulur.
Komissiya, həmçinin pensiyaya çıxma yaşının mümkün yüksəldilməsini və daha çox gəlir qruplarının pensiya sisteminə daxil edilməsini də araşdıracaq. Bundan əlavə, hökumət gənc nəslin özəl və korporativ pensiya yığımını artırmaq üçün dövlətə məxsus səhmlərdən əldə olunan dividendlərlə xüsusi dəstək proqramı tətbiq edəcək.
Kansler Fridrix Merts bu çərçivədə dövlətin “Telekom”, “Deutsche Post” və “Commerzbank”dakı paylarının prosesə cəlb olunacağını bildirib. Yeni razılaşmanın məqsədi Almaniyada pensiya sahəsində uzun illərdir ehtiyac duyulan islahatların həyata keçirilməsidir.
Ən son xəbərləri və yenilikləri almaq üçün ain.az saytını izləyin.
