Metbuat saytına istinadən ain.az xəbər verir.
Hazırda taksilərdə uşaqların daşınması ilə bağlı xüsusi qaydalar praktiki olaraq geniş yayılmayıb. Bu da bəzi sürücülər üçün müəyyən narazılıqlar yaradır. Bir çox taksi sürücüsü uşaqlı sərnişinlərlə bağlı yaranan problemlərdən – avtomobilin çirkləndirilməsi, zədələnməsi və nəzarətsiz hərəkətlərdən şikayət edir. Bu halda taksi şirkətləri uşaqlı sərnişinlər üçün ayrıca kateqoriya yaratmalıdırlar?
Nəqliyyat eksperti Ərşad Hüseynov Metbuat.az-a açıqlamasında bildirib ki, bu, məcburi deyil və yalnız tələbatdan asılıdır:
“Hazırda qüvvədə olan qaydalara əsasən 12 yaşadək uşaqların qabaq oturacaqda daşınmasına yalnız xüsusi uşaq oturacağı ilə icazə verilir. Arxa oturacaqda isə bu yaş qrupuna dair xüsusi məhdudiyyət yoxdur. Yeganə istisna üç yaşına qədər uşaqlarla bağlıdır ki, əgər uşaq arxa oturacaqda təkdirsə və yanında böyüyü yoxdursa, onu xüsusi oturacaq olmadan daşımaq qadağandır. Uşaqların sayına dair də ayrıca məhdudiyyət yoxdur”.
Ekspert taksi sürücülərinin uşaqlı sərnişinlərlə bağlı narazılıqlarına da toxunub. Onun sözlərinə görə, uşaqların avtomobili çirkləndirməsi və ya salonun zədələnməsi hüquqi deyil, daha çox etik məsələdir və bu məqam valideynin məsuliyyəti kimi dəyərləndirilməlidir.
Sevinc İbrahimzadə / Metbuat.az
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
