Moldova parlamenti MDB çərçivəsində bağlanmış sazişlərin denonsasiyası ilə bağlı bir sıra qərarlar qəbul edib.
Yeniavaz.com “Moldpres”ə istinadla xəbər verir ki, Xarici İşlər Nazirliyi və Maliyyə Nazirliyi tərəfindən hazırlanan qanun layihələri parlamentdə birinci oxunuşda qəbul edilib.
Denonsasiya edilən sazişlər arasında 1992-ci ildə Bişkekdə imzalanan MDB vətəndaşları üçün vizasız rejim haqqında saziş də var. Bu sazişin ləğvi Moldova ilə Qırğızıstan və Tacikistan arasında vizasız rejimin ləğvini nəzərdə tutur.
Qanun layihəsini təqdim edən Moldova Xarici İşlər Nazirliyinin baş katibi Mixay Mitsu qeyd edib ki, bu qərar yalnız qeyd olunan iki respublika arasında qarşılıqlı səfərlərə təsir edəcək.
Moldova digər MDB ölkələri ilə ikitərəfli vizasız səyahət sazişləri bağlayıb.
Mitsu Moldovanın 2000-ci illərin əvvəllərindən Qırğızıstan və Tacikistanla ikitərəfli müqavilələr bağlamağa çalışdığını, lakin bu günə qədər bu məsələ ilə bağlı heç bir cavab alınmadığını bildirib.
Onun sözlərinə görə, hazırkı sazişin denonsasiyasından sonra Kişinyov vizasız rejimlə bağlı danışıqlara başlayacaq.
