Tramp: “Üçüncü Dünya ölkələrindən immiqrasiya tam dayandırılacaq”
Ajans.az xəbər verir ki,o, açıqlamanı Truth Social platformasında yayımlayıb. “ABŞ sisteminin tam bərpa olunması üçün bütün Üçüncü Dünya ölkələrindən miqrasiyanı dayandıracağam. Bayden tərəfindən verilmiş milyonlarla qanunsuz giriş icazəsini — o cümlədən onun imzaladığı bütün sənədləri — ləğv edəcəyəm. ABŞ-a xalis fayda gətirməyən və ya ölkəmizi sevməyə qadir olmayan hər kəs ölkədən çıxarılacaq”, — deyə Tramp yazıb. Prezident əlavə edib ki, ABŞ vətəndaşı olmayan şəxslər üçün bütün federal müavinət və subsidiyalar ləğv olunacaq. Onun sözlərinə görə, daxili asayişi pozan miqrantların vətəndaşlığı ləğv ediləcək, təhlükə yaradan və ya Qərb sivilizasiyası ilə uyğun hesab edilməyən bütün xarici vətəndaşlar deportasiya olunacaq. Trampın açıqlamaları ABŞ-da miqrasiya siyasəti ilə bağlı yeni müzakirələrə səbəb olub.
