Leobank istifadəçisi Rafiq Paşayev bildirir ki, 5.11.2025 tarixində qarşı tərəfə göndərdiyi 52 manatlıq ödəniş tətbiqdə “imtina edildi” kimi görünsə də, 22 gün sonra həmin məbləğ kartından çıxılıb və balansı mənfi göstərilib. Şikayətçi deyir ki, bu müddət ərzində heç bir xəbərdarlıq olmayıb və yaranan borc yalnız noyabrın sonunda üzə çıxıb.
AzPost bildirir ki, məsələ ilə bağlı Leobankın müştəriyə göndərdiyi cavab məktubunda aşağıdakılar qeyd olunur:
“Balansda yaranan silinmə həmin ‘imtina edilmiş’ əməliyyatın tarix və saatı üzrə aparılan texniki yoxlamalarla bağlıdır. Baxmayaraq ki, əməliyyat tətbiqdə ‘imtina’ kimi görünür, vəsait texniki səbəbdən qarşı tərəfin kartına faktiki olaraq mədaxil olunmuşdur. Bu səbəbdən qarşı tərəflə əlaqə saxlayaraq məbləğin geri qaytarılmasını təmin etməyiniz və mənfi balansı bərpa etməyiniz xahiş olunur.”
Bank əlavə edib ki, yaranmış borc müəyyən vaxtda ödənilməsə, məsələ aidiyyəti qurumlara göndərilə bilər.
Həmçinin narahatlığa görə üzr istənilib və belə halların azaldılması üçün araşdırma aparıldığı bildirilib.
Rafiq Paşayev isə hesab edir ki, 22 gün sonra sistemin “ayılması” və borcun bu qədər gec göstərilməsi müştərilərin haqsız yük altına düşməsinə səbəb olur.
