Araşdırma göstərir ki, şöhrət ömrü 4–5 il qısalda bilər…
Poliqon xəbər verir ki, məşhurluq yalnız səhnə işıqları, alqışlar və populyarlıq deyil. O, həm də uzunmüddətli sağlamlıq riskləri və daha qısa ömür deməkdir. "Journal of Epidemiology & Community Health" jurnalında dərc edilən yeni tədqiqat göstərib ki, geniş tanınan vokalistlər, az tanınan həmkarlarına nisbətən orta hesabla bir neçə il daha tez dünyasını dəyişir.
Almaniyanın Witten/Herdecke Universitetinin alimləri 648 müğənni barədə məlumatları təhlil edib. Bu qrupun yarısı məşhur, digər yarısı isə karyerası boyunca geniş tanınmamış vokalistlərdən ibarət olub. Tədqiqatçılar hər bir məşhur müğənnini cins, musiqi janrı, mənşə, fəaliyyət dövrü və oxşar göstəricilərə malik az tanınan həmkarı ilə müqayisə edərək digər amillərin təsirini istisna etməyə çalışıblar.
Nəticələr təsdiq edib ki, məşhur müğənnilər orta hesabla 75 yaşında dünyasını dəyişirlər, halbuki daha az tanınan ifaçıların orta ömür uzunluğu təxminən 79 il təşkil edir. Yəni fərq 4–5 ilə qədərdir.
Tədqiqatın müəllifləri bu fərqi birbaşa şöhrət fenomeni ilə əlaqələndirir. Onların sözlərinə görə, məşhurluq yalnız uğur deyil, həm də davamlı stress deməkdir: ictimaiyyətin diqqəti, şəxsi həyatın itirilməsi, gərgin qastrol qrafiki, daim göz altında olmaq və bunun doğurduğu psixoloji təzyiq. Bütün bunlar bəzən alkoqol və narkotik istifadəsi, eləcə də pozulmuş həyat ritmi kimi sağlamlığa zərərli davranışlara gətirib çıxarır.
Alimlər vurğulayırlar ki, ömrün qısalması musiqiçinin həyat tərzindən yox, məhz tanınmaqla yaranan daimi psixoloji yüklənmədən qaynaqlanır. Şöhrət artdıqca təzyiq də artır və bu, uzunmüddətli sağlamlıq vəziyyətinə təsir edir.
Araşdırma nəticələri musiqi sənayesində psixoloji dəstəyin əhəmiyyətini bir daha gündəmə gətirir və tanınmış ifaçıların qarşılaşdığı risklərin nə dərəcədə böyük olduğunu ortaya qoyur.
Poliqon.info
