Elvin Məmmədov “Səbail”dən getdi – İlk məğlubiyyət bağışlanmadı

Futbol üzrə Azərbaycan Birinci Liqasında mübarizə aparan “Səbail” komandasının baş məşqçisi Elvin Məmmədov istefaya göndərilib.

Arena.az xəbər verir ki, bu barədə paytaxt klubunun rəsmi saytı məlumat yayıb.

Bildirilir ki, bu gün Birinci Liqanın 9-cu turu çərçivəsində “ASCO Arena”da keçirilmiş “Səbail” – “Cəbrayıl” oyunundan sonra “Səbail” PFK-nın İdarə Heyətinin iclası keçirilib. Toplantıda İdarə Heyətinin üzvləri ilə yanaşı, klubun məşqçi heyəti də iştirak edib və mövsümün əvvəlindən bu günə qədər keçirilmiş oyunların nəticələri müzakirə olunub, müsbət və mənfi məqamlar qeyd olunub. İclasda baş məşqçi Elvin Məmmədovun hesabatı dinlənilib. Toplantının sonunda Elvin Məmmədovun istəyinə əsasən baş məşqçi və köməkçiləri ilə klub arasında bağlanmış müqaviləyə qarşılıqlı razılıq əsasında xitam verilib. İdarə Heyəti məşqçi heyətinə göstərdiyi xidmətlərə görə təşəkkür edib, onlara gələcək karyeralarında uğurlar arzulayıb.

Xatırladaq ki, Elvin Məmmədov 2024-cü ildə də “Səbail”də baş məşqçinin vəzifəsini müvəqqəti icra etmişdi. Bu ildən isə o, “dənizçilər”in baş məşqçisi kimi fəaliyyətdə idi.

Ötən mövsümün yekunlarına əsasən “Səbail” Premyer Liqanı tərk edib və bu mövsüm Birinci Liqada mübarizə aparır. Komanda cari mövsümdə keçirdiyi 9 oyunda 5 qələbə qazanıb, 3 heç-heçə edib, 1 məğlubiyyət alıb. İlk məğlubiyyətini məhz bu gün almış paytaxt klubunun rəhbərliyi bu uğursuzluğu Məmmədova bağışlamayıb.

“Səbail” 9 turdan sonra 18 xalla Birinci Liqanın yarış cədvəlində 2-cidir. Turnir cədvəlinə 23 xalı olan “Şəfa” başçılıq edir.