Rasim Əliyev – “Şəmkir”in yeni baş məşqçisi!

Son olaraq “Turan Tovuz”un futbol akademiyasının koordinatoru vəzifəsində çalışmış Rasim Əliyev “Şəmkir”in baş məşqçisi təyin edilib.

Arena.az bu barədə əyalət klubunun mətbuat xidmətinə istinadən xəbər verir.

Azərbaycanın 2-ci Liqasında mübarizə aparan “Şəmkir” bir müddət öncə Vüqar Nadirovla yollarını ayırandan bəri baş məşqçisiz idi. Artıq Nadirovu kimin əvəz edəcəyi dəqiqləşib. Klub Rasim Əliyevlə anlaşıb. Son olaraq “Turan Tovuz”un akademiyasının koordinatoru vəzifəsində çalışmış A kateqoriyalı mütəxəssislə 6 ay + 1 illik müqavilə imzalanıb.

Xatırladaq ki, Əliyev daha əvvəl “Turan”la yanaşı, “Rote Fahne”, “Neftçala” komandalarını çalışdırıb. O, “Feyenoord”, “Utrext”, PSV (hamısı Niderland), “Fənərbağça”, “Gənclərbirliyi” (hər ikisi Türkiyə) və “Dinamo” (Tiflis) klublarının düşərgələrində təcrübə keçib.

“Şəmkir” İkinci Liqanın 2025/2026-cı illər mövsümündə keçirdiyi 10 oyunda 6 qələbə qazanıb, 4 məğlubiyyətə üzülüb. Komanda 18 xalla 5-ci pillədə qərarlaşıb.